Vawiin chawhnu dar 2 khan Pu R.Lalzirliana, Home Minister chuan chanchinthar lakhawmtute a Office Chamber-ah kawm in, hmeichhiate zahawmna tih bawrhban sak ching kan awm ta fo mai chu a ngaihmawh thu leh sawrkarin a chhui tur thu a hrilh.

 

 

“Mipat hmeichhiatna hman hi thianglo nilovin, a tituten induh tak leh remtih tlanna a an lo tih hi sawisel thei kan nilo, mahse, hmeichhiate an hmingtha sa tih chhiat tum tute, ti mualpho leh si tute hi dim an ni dawn lo a ni,” tiin Pu Zira chuan tunhnai maia hmeichhe zaithiamte tih hmingchhiat an nih chungchanga pawi a tih thu a sawi.

Home Minister tawiawmtu Pu K.Lalsawta, Law Minister chuan, “Hetiang tih ching te hi Dan ah hrem theihna tam tak a awm a, Mizo hnam ti mualpho tute hi chu Mizo mipui ten kan dem hle hi an phu hliah hliah,” a ti.

Aizawl District Police S.P. Pu Lalbiakthanga pawhin lehkhabu, film,  paper, slide, drawing, painting leh thil danga sex chungchang thehdarh te hrem theih dan chi hrang hrang a vawi khatna ah kum 2 lungin tan leh chawi, a vawi hnihna ah thla 6 atanga kum 5 thleng tan theih dan leh thil dangte a sawi.

Home Minister chuan dan piahlam a phalna neilo Petrol/Diesel hralh thinte hian tunlai khawro takah hian kangmei an tih chhuah nasat theih avanga khapna siam a nih tur thu Press mite hi a hrilh a, khapna siam a nih hnu a zuar/hralh ru an awm chuan hrem an tum thu a sawi bawk.

Pu Zira chuan chanchinthar lakhawmtute chu ram rawngbawlna leh hnam humhimna kawngah te nasa taka thawktu an nihna angin sawrkar hmalakna tha taka puibawm a, an kalsual dawn pawha hruai ngil tu tura a beisei thu a sawi.

Home Minister hi Pu Lalrinmawia Ralte, MLA, Parliamentary Secretary pawhin a tawiawm a ni.