Biate khua a YMA Day vawi 76 na chu Pu Zodingtluanga, Sport, UD & PA leh I & PR Minister chuan Biate Z.C. Hall ah a hmanpui a, khawtlangin an lo lawm hle.

Minister Pu Zodintluanga chuan khawtlang nu leh pate duhsakna a zara YMA hruaitu kum 10 zet a zawna a lo nih ve tawh avanga hruaitu hlun chawimawina a lo dawn ve tawh thu sawiin fate zilh kawngah nu leh pa-in tanlak lehzual a ngaih thu uar takin a sawi a ni.

Khawtlang nun siamthatna kawnga Mizo in harsatna lian tak kan tawh mek chu sum leh pai a kan intlansiakna hi a ni a, a thlawn a sum dawn kan chak lutuk te, hausak thut kan chak tlatna hian ram ropui min thlen thei lo a, rim taka hnathawk turin kan rilru siamthar a ngai a ni tiin Minister chuan khawvel inher danglam leh changkang tak pawhin a nuai danglam ve mai mai theih loh YMA kan nei hi kan hruaitu hmasate thawhrah a ni a, an thawhrimna leh inpekna te hre rengin thangtharte pawhin kan chhawm nun zel a pawimawh hle a ni tiin Mizoram a YMA branch 781 awm zinga YMA Branch nung leh hmala tha pawl tak an nihna chu chhawmnung zel turin Biate khaw mipuite chu a chah a. YMA chu Mizote nuna ber tlat leh a hming ringawt pawhin Mizo mipuite min thlamuan tih sawiin YMA hian tunlai khawvel hmasawnna leh intihsiakna leh inchungnun siakna ah hian hmasial takin hlawk tuma hmala in a kuang lo a nawr ang tih a hlauh thin thu a sawi a, hei vang hian Mizo zawng zawngten he pawl hi a chhiat kan hlau tur a ni a, a kalsual lohna turin mitinin mawhphurhna kan nei a ni a ti.

NLUP chunchang pawh sawiin Minister chuan hun hmasa lama Biate atanga NLUP dawng engemaw zatin a huhoa thingpui ching a, in 350 velin an ti puitling thei chuan a ti lawm tak zet tih sawiin NLUP tanpuina dawngte chu taima leh tih takzeta hna an thawh a pawimawh em em a. Khawi ramah mah hetianga sorkar-in sumfaia tanpuina a pek hi a awm lo va, a hlawhtin nana tha taka thawh hi tanpuina dawngtute mawhphurhna a ni a ti.

YMA Day hmanna 2nd Session hi Dr. Lalengzauva, President Biate Br. YMA in a kaihruai a, member boral sunna hun hmangin section tin atangin intihsiakna te neih a ni a, zai mawi tak takte ngaihthlak a ni.

Minister hi Biate ah riakin tlailam khan Biate Field chei that dan turte a hmunah kalin a enpui a. Biate khuaa GSA te hnenah infiamna hmanrua te a sem nghal a ni.Minister hian a lo haw lamah Khawzawl a IR Battalion hmun tlawh nghalin hotute nen inkhawmna hun tha tak an hmang ho a ni.

Attachment

  • Loading attachment...