Pu Zodintluanga, Minister Sports & Youth Services chuan tukin zing dar 7 atang khan Champhai a field te tlawh kualin, hmachhawp leh hmalakna kal mek te a enpui.
Champhai khawchhunga Chhangphut field chhaka leimin thin lungrem te enpui a ni a. Minister chuan a tir atanga monitoring a pawimawh thu sawiin NBCC hmanga hmalak dan tur te leh Champhai Vengthlang Biak In bul kawr dung zuiin vantlang kalna tur step dawh chhoh dan tur te pawh sawi ho nghal a ni.
New Champhai field pawh a hmunah Minister hian a tlawh a, khelmual tur siam mek sir a Tennis Court siam zawh mek a gate siam dan tur leh hma lak zel dan tur te thlir ho nghal a ni.
Hemi hnu hian Chief Minister Pu Lal Thanhawla’n Zotlang a Indoor Stadium puitling siam tur a hma a lo lak pui tawhna chu Sport Minister Pu Zodintluanga hian tlawhin chipchiar taka enkual leh nghal a ni a, Rs. 2,48,88,000/- senga Indoor Stadium sak tur ah hian sawrkarin ram zau tak a nei fel tawh in Detail Project Report pawh central lamah thehluh a ni tawh a. He complex ah hian Football ground bakah mimal intihsiakna hrang hrang - Long jump, High jump, intlansiak etc. na tur 8 (pariat) lane a leng tel nghal vek dawn bawk a ni.
Pu Zodintluanga hian Hringlang tlang leh Zokhawthar te chhun lamah a tlawh lehnghal a. Sorkarin Champhai District tana hma a lo lak tawhna leh a hmachhawp te a enkual nghal a ni. Zaninah Champhai ah a riak ang a, naktukah Khawbung lamah a kal ang a, Aizawl lamah a hawng nghal ang.
