Urban Development & Poverty Alleviation Minister Pu Zodintluanga’n vawiin khan khawpuia mirethei cheng te tana Basic Services to the Urban Poor (BUSP) kaltlanga Lawipu a chenna in sak mek Lawipu BSUP Housing Project a tlawh a. A hmunah hian amah tawiawmtu Urban Development & Poverty Alleviation Department Director leh a thawhpuite, Public Health Engineering leh Power & Electricity Department-a engineer te nen he Project hnuaia insak te enin a hmun hma te an fangkual a, helai hmuna tui leh eng pek dan kawng te sawi hovin hemi chungchangah hian ruahmanna leh rawtna an siam bawk a ni.

Pu Zodintluanga chuan he project hi kum 2008 vel atanga sak tan anih thusawiin harsatna tam tak paltlanga he project peihfel tep a ni chu lawmawm a tih thu a sawi a. Hun engemaw chen a sak hna a khaihlak hnuin tunah a satu contractor te hi tlawmngaia sa chhunzawm turin a ngen a, anni pawhin hlawkna em em nei lovin an sa chhunzawm hram hram a, a rate te hi 2007 rate a ni a, a sakna rate hi ennawn theih a nih loh avangin a satute pawh hian tlawmngaih chhuahin an sa hram hram nia a hriat thu a sawi bawk.

Sawrkar Laipui atanga he project atana sum lokal fund flow lamah harsatna a awm a, chumi hnuah a satu contractor in harsatna a neih avangin hna a tawp a. Hun engemaw chen hna a khaihlak hnuin, sak chhunzawm leh a ni a. Tunah hian a building te hi sak zawh thawkhat niin tui, electric connection leh rawng hnawihte la hmabak a ni.

Lawipu BUSP Housing Project hi Sawrkar Laipui Ministry of Housing & Urban Poverty Alleviation sum ruahman atanga sak niin he project atan hian cheng nuai 3403 ruahman a ni a. A project neitu hi Urban Development & Poverty Alleviation Department niin a implementing agency chu Hindustan Prefab Ltd. a ni. He project hnuaiah hian Building Block 28 sak a ni a, heng ah hian chenna in(dwelling unit) a zavaiin 408 a awm. Hemi bakah hian he project atan Community Centre leh Livelihood Centre te sak a ni bawk a, building block tin tan tui tanky pawh sak tel a ni.

Vawiin vek khan UD & PA Minister Pu Zodintluanga chuan Lawipu Field an tlawh a, a hmunah hian Lawipu khawtlang hruaitute nen field zauh dan an sawi ho a, hemi hnu hian Lawipu Community Hall sak mek pawh an en nghal bawk a ni. Lawipu Field laih hna hi tunhma khan Minister hmalaknain a bul tan a lo ni.