Vawiin khan ICT Minister Pu Zodintluanga chuan Mizoram State Wide Area Network (MSWAN) hmunpui Secretariat hlui( Raj Bhawan bul) a bun fel tak chu tlawh a. Hemi building vek a State Data Centre (SDC) bunna tur pawh, ICT Department aiawhte nen an en ho nghal a ni.

MSWAN hmunpui hi peih fel ni tawhin, a building leh bungrua te pawh bun fel a ni tawh a, March thla tawp lam emaw April thla tir lamah emaw hawn hman beisei a ni. SDC bunna tur hmunah hian Printing & Stationery Secretariat, Mizoram Youth Commission Office leh ICT office thenkhat a la awm avangin, SDC sak hna hi tan theih ala ni lova. SDC atana khawl leh bungraw dangten Aizawl a lo thlen veleh hna tan nghal anih theih nan Minister chuan heng office aiawhte chu an office sawnchhuah dan tur a sawipui a, an in sawnchhuah nan ruahmanna pawh an siam nghal a ni.

MSWAN hnuaiah hian State Headquarters pakhat, District Headquaters 7 leh Block Headquarters 11 te chu peih fel ani tawh a. Block 15 ah chuan BSNL link ala awm loh avangin harsatna an tawk a ni.

Minister hi ICT Secretary Pu S.S. Garbyal leh ICT Department aiawh dangten an tawiawm a ni.