Nimin chawhnu khan Saiha khawpuia Independence Day lawmna a khuallian ni tura lo kal Pu Zodintluanga,UD&PA Minister chuan Mara rama Missionary hmasa ber Pu Reginald Arthur Lorrain hming chawi a sak, R.A.Lorrain Market a hawng. He RA.Lorrain Market hi cheng nuai 380.78 senga sak a ni a, a sakna sum hi DoNER Ministry atanga hmu a ni. Zopa chhiara chhawng hnih niin,chhawng hnuai zawkah dawr kua 16 leh chhawng chung zawka dawr kua 13 a awm a, basement zau tawk tak light vehicle 29 lai park theihna a nei bawk a ni. Basement tiamin RA Lorrain Market len zawng hi 1267.50Sqm a ni.

RA Lorrain Market hawnna inkhawmah thusawiin Pu Zodintluanga chuan Saiha khawpui hi Mizoram khawpui hlun pathum te zinga mi niin,Aizawl, Lunglei leh Saiha tih thin kha a ni a. Mahse hmasawnna kawngah Saiha khawpui hi Mizoram khawpui dang te aia hnufual deuh zawka sawina a awm thin avangin,a NIHNA ngaia chawikang leh turin Sawrkarin theitawp chhuahin ruahmanna hrang hrang a siam mek a ni, a ti. Pu Zodintluanga chuan an sawrkar chhung hian Saiha District tan hian Mizoram sawrkar chuan thil chhenfakawm tam tak, Saiha Greater water Supply Scheme te, Tuipang Greater water Supply Scheme te, Indoor Stadium leh Community Hall te khaw tam takah an sak bakah, mirethei in leh lo nei lo tam tak tan in sak tawh a ni a, Housing for All Scheme hnuaiah la sak chhunzawm mek zel a ni, a ti bawk.

Pu Zodintluanga chuan Saiha District thalaite tuihalna hriain, Artificial turf phahchhuah vek Khelmual tha siam hi a ngai pawimawh hle thin a, mahse chutiang Khelmual tur hmunhma tha leh remchang a awm loh avangin hmalak ngaihna a awm lo a ni, a ti a. Tunah chuan Saiha Town Area chhungah SDFA( Saiha District FootBall Association) ten khelmual tur hmun Thingsen khuaah an neih tawh a, MADC lam pawhin SSB(Sashastra Seema Bal) ram rauhsanah khelmual tur an neih bawk a. Heng khelmual pahnih te lo zirchiang tur hian NBCC Engineer te an lo kal mek a, a hmunah lo en in, DPR te siamin kan bawhzui nghal char char dawn a ni, a ti bawk.

RA Lorrain Market a hawn hnuah Minister hian thingsena SDFA Khelmual leh SSB rama Khelmual te leh Saiha New Colony venga Indoor Stadium sak mek te a hmunah a tlawh a ni. Minister Pu Zodintluanga hi MADC hruaitute, Mizoram sawrkar hnuaia Head of Office te, SDSA( Saiha District Sports Authority) hruaitute , SDFA( Saiha District FootBall Association) hruaitute leh chanchinbu mi ten hmun hrang hrang tlawha a kalkualna-ah hian an tawiawm a ni.