Taxation Department changtu Minister Pu Zodintluanga chuan vawiin chawhnu khan New Secretariat Complex-ah (ZIDCO Office bul) Taxation Department hmunpui, Commissionerate Building sakna tur lungphum a phum. Hemi programme puala inkhawm tawite neih chu Pu R. L. Rinawma, IRS, Principal Secretary, Taxation Department  chuan a kaihruai a ni.

Pu Zodintluanga chuan Taxation Department Building sakna tur lungphum a ni ta chu Department tan chuan ni chhinchhiah tlak tak leh hun rei tak atanga an lo nghahlelh em em a ni, a ti a. Taxation Department chu Department naupangte ni mahsela Mizoram Sawrkar tan chuan Department pawimawh tak mai a ni a, Department in sum a chhun luh te chu Mizorama hmasawnna hnathawh nan a tangkai em em a, central scheme-a state matching share tur sum te pawh heng sum chhunluh atanga ruahman thin a nih thu a sawi bawk.

Pu Zodintluanga chuan Building sak thar turah hian tunlai thiamna mil a, hun inher chho mek ngaituaha a hmunhmaah, room pin danah te leh eng ruahman dan chungchanga te ngaituahna hmang se tiin a duh thu a sawi a. Hna quality-a, PWD chu a tir atanga uluk turin a chah bakah Department lam pawhin a neitu an tih hre renga building sak hna chu tlawh thin turin a fuih bawk a ni.

Pu RL Rinawma chuan building hi intelligent building tura sak a pawimawh thu sawiin, Internet leh Phoneline inthlunzawmna te chu duct mumal taka siam a pawimawh thu te leh eng pek dan ah pawh tunlai thiamna hman a tul thu a tarlang a ni.

He hunah hian PWD atangin Building sak dan tur Technical Report pek a ni a. PWD in an tarlan dan chuan building hi chhawngruka sak tura ruahman niin tunah hi chuan chhawngthum sak phawt a ni anga, a bak chhawngthum chu future extension tur a ni ang. Tunah floor sak turte chu basement I, a zau zawng, 565 square meter; Ground Floor, a zau zawng 565 square meter leh First Floor, a zau zawng 562 square meter te an ni. Heng chhawng thum Working Estimate floor area belhkhawm chu 1692square meter a ni. Future Extension ah hian Basement II & III leh 2nd Floor te sak tura ruahman niin heng floor area chu 966.75 square meter a ni.

Building satu tura thlan chu Pu F. Sangkunga niin he hna tendered amount chu cheng 3,87,36,320 a ni a, thla 24 chhunga sak zawk tur a ni.

Building lungphumna ah hian Taxation Department hotulu leh a thawhpuite bakah PWD senior officers engemaw zat an tel a ni.

Taxation Department hnathawh hi mipuiin an chhawr hle a, sawrkar a sum chhunglut hnem ber leh mipui rawngbawlna kawngah, Information Technology hmang thiam ber an niin a lang. Sawrkar kum 2012 – 2013 khan revenue an hmuh tur zat cheng vaibelchhe 170.27 tuk anih laiin cheng vaibelchhe 184.96 an chhunglut a, an target hi cheng vaibelchhe 14.69 in an khum a ni. Sawrkar kum kalta ah an sum chhunluh hi a hma (2011-2012) aiin cheng vaibelchhe 35.47 in a pung a ni.

Computerization of Tax Administration hnuaiah Department leh sumdawng te hman atan software changtlung tak ‘VATSoft’ siam a ni a. Hemi hmang hian sumdawng te’n eServices hrang hrangte tangkai leh awlsam takin office lam kal buai ngai lovin mahni in leh sumdawnna hmun atangte in an hmang thei tawh a. Sumdawng te’n eServices an hman apiangin information pawimawh leh confirmation messages an mobile phone-ah SMS in an dawng zel bawk. Hei bakah hian website changtlung taka www.zotax.nic.in atangin mipuite leh sumdawng ten mahni in atangin taxation office an dawr thei a, website ah hian information hrang hrang bakah dan bu, tax rates, news, forms, notifications, circulars leh orders te download theihin dah a ni bawk.