Vawiin khan Lawngtlai DC Conference Hall ah Pu Zothankhuma, IAS, Secretary, Revenue Department hovin National Land Records Modernization Programme; Lai Autonomous District Council leh Chakma Autonomous District Council huam chhunga hman ve dan tur inrawn khawmna leh inhrilhfiahna hun hman a ni.

Pu Zothankhuma chuan National Land Records Modernization Programme kalphung leh an hnathawh dan sawifiahna tlangpui neiin Mizoram a kalpui chin tawh te leh hmabak la awm te a tarlang a, Lawngtlai District leh Saiha District pawh kum 2016-17 chhunga thawh zawh tur a nih thu sawiin hnathawh dan turah Council hotute nena sawiho tura lokal a nih thu a sawi a. Hnathawhna tur pawisa kal dan tur leh ram neitu State/Council te lo tum ve tur te pawh a tarlang nghal bawk.

Hemi hnu hian Revenue Department Director, Pu R. Lalramnghaka chuan National Land Records Modernization Programme kalphung te chipchiar takin a lem nen a hrilhfiah bawk a ni.

He Meeting hi Lawngtlai Bawrhsap Pu J. Hmingthanmawia’n a kaihruai a, District Council pahnih atangin Revenue changtu Executive Member te bakah Department a Officer leh Technical lama mawhphurhna neite an tel a ni.

Secretary Pu Zothankhuma hi Revenue Director Pu R. Lalramnghaka bakah Joint Director (Technical) Pu Dawngkima ten an tawiawm  a ni.