No.2439/2020-2020

Aizawl, the 25th June 2020 : Vawiin khan Aizawl West-I bialtu MLA leh Manpower Development Board Vice Chairman ni bawk Pu Zothantluanga’n Sairanga mitthi halna hmun Gas based Crematorium, Urban Development & Poverty Alleviation Department hmalaknaa sak chu a hawng. AMC Ward X Councillor Pu R. Lalbiakthanga leh Ward XI Pu H. Zonunsanga ten Pu Zothantluanga hi an tawiawm a ni.

Pu Zothantluanga chuan he mitthi halna hmun hmang tangkai tur ber Aizawla cheng Gorkhali te chu Mizote nen inpeizawna chengho, lawmna leh harsatnate intawm thin an nih thu sawiin Crematorium changtlung tak Sawrkarin a peihfel chu an tan mai bakah Mizoram tan pawh hun lokal zel tur ngaihtuahin thil tangkai tak a nih a beisei thu a sawi a. Hnam tin leh sakhaw tinin mitthi sawngbawl chu an rilru damna leh an lungawina tur ang thlapin an ti thin tiin Crematorium chuan mipui mamawh, a bik takin Gorkhali leh hnamdang ten hun rei tak atanga an lo mamawh chu a phuhru dawn a ni, a ti. Mamawh dang – kawng black top te, tui lakna leh electric mamawh te chu a tahtawlin Sawrkarin a ngaihtuah chho zel tih a sawi bawk.

Hun kaihruaitu UD &PA Director Pu HVL Zarzoenga chuan a hmun hma velah hmalakna tur leh siam belh tur la awm nual mahse tun dinhmunah a bik takin hnamdang unau, mitthi vuina atana inhal thin ten an mamawh tawh em avangin leh tunlaia hripui leng khawvel pawhin a buaipui COVID-19 thleng mekah hian thihna te lo tleng ta se, helai bak lo chu in vuina atana inhalna tur a awm si loh avangin inhalna khawl ber bun fel a, hman theih a nih tawh avangin hawn a ni ta tiin a sawi.

He huna tel Mizoram Gorkha Youth Association (Central) hruaitute chuan Crematorium chu hun rei tak atanga an lo buaipui ve tawh a nih thu sawiin hawn a ni ta chu Sawrkar hnenah lawmthu an sawi a ni.

Crematorium hawnna inkhawm tawite hi UD &PA Director Pu HVL Zarzoenga’n kaihruaiin Assistant Engineer, UD&PA Department Pu Laldinsanga Hnamte hnen atangin Crematorium sak dan chungchang Technical Report ngaihtlak a ni a. EE, UD &PA Department Pu C. Malsawma’n lawmthu sawiin hun a khar a ni.

Sairang-a Crematorium hi Special Plan Assistance (SPA 2013-2014) leh NEDP 2017-19 scheme hnuaia sum ruahman hmanga sak niin cheng nuai 120 sengin a hmun hma te buatsaih a nih bakah khawl te bunfel a ni a. A sak hna hi February 2015 ah tanin November 2018-ah zawhfel a ni. A hmunah hian electric line a luh loh avangin hun rei tak sak a nih hnuin test theih a ni lova, nikum lamah test a ni ta.

Sairang-a Crematorium-ah hian LPG Crematorium Furnace Chamber, a ruala Commercial LPG cylinder 30 hmang tur bun a ni a, khawl hunna in chu RCC building a sak niin a dung feet 12.40 leh a vang feet 6.50 a ni a, meikhu chhuahna tur Chimney feet 40 a sang a awm bawk a. Inbualna leh inthiarna hmun bakah permanent works – approach road siam te, lirthei dahna tur hmun laihzawl te, retaining wall leh culvert te siam a ni bawk a. Heng zawng zawng hi SPA atanga nuai 100 ruahman atanga sak a ni a. Kum 2017-18 khan NEDP sum nuai 20 ruahman leh niin he sum hmang hian Caretaker/Attendant Quarters sak a nih bakah Diesel Generator set(10 KVA – 3 Phase) bun a ni.

Gas hmanga mitthi halna Crematorium-ah hian ruang pakhat halral nan Commercial LPG bur 2 vel hmanral tura chhut niin a khawl hi Gujarat lam atanga lak luh a ni a. Hmarchhak bialah LPG hmanga inhalna Crematorium hmasa ber chu Guwahati ah 2012 khan hawn niin Sairang a mi vawiina hawn tak hi a dawttu a ni.

Aizawl leh a chheh vela cheng Gorkhali leh hnamdangte hian mitthi halna hmun mumal an nei lova, kum 1920/30 bawr khan Gorkhali-te hian Chite lui kamah mitthi an hal thin a, a hnu kum 1940/1950 bawr chho ah tuna MINECO Complex-a, High Court Building sak mek hmunah an inhal leh a. Kum 1980 bawr atanga tun thlengin Tuirial khawtlang hruaitute nen inberawnin Tuirial kamah an inhal thin a ni. Mahse tunlai hrileng mek avangin chhuna inhal a rem loh avangin tlai lamah mitthi ruang te halin zanlai velah an zo fel chauh thin a ni.