No.6911/2020-2021

Vawiin chawhnu khan, Sakawrtuichhun Branch YMA Library Building thar chu Manpower Development Board Vice Chairman leh Aizawl West-I MLA ni bawk Pu Zothantluanga  chuan a hawng.

Sakawrtuichhun Library thar hawngtu Pu Zothantluanga, MLA chuan an Library thar chu finna leh thiamna chhar chhuahna atana mangkai taka hmang turin Sakawrtuichhun khawtlang mipuite a chah.

Tun lai Information Technology-in nasa taka hma a sawn a. Hman lai huna mi tlem tein an neih thin Telephone te pawh, tunah chuan mitin tih theihin Phone changkang tak tak kan lo nei ta a. Kan phone hmangin thil chi hrang hrang a tih theih bawk nen, Chuvang chuan mitin hian lehkha chhiar kan peih lovin kan hlamchhiah telh telh ta niin a lang a. Chanchinbu tak ngial pawh chhiar peih lo kan tam ta. Chutihrual chuan, lehkha chhiar tam pawimawhna a la pangngai reng bawk a, lehkha chhiar tam a, hre zau na na chuan mifing nih an la hlawh zel bawk si. Chutiang chu kan dinhmun a nih laia hetianga kan khawtlang hruaituten kan chhiar tamna tur atana awlsam taka kan pan mai theih Library tha tak mai min siam sak hi a hlu tak zet a, a hlutna leh a pawimawhna hria a, mangkai taka hmang turin duhsakna ka hlan a che u” tiin, Library hawnna a kal khawm te chu a fuih a ni.  

He Library hawnna hun hi Pu Zothantluanga MLA bakah hian, Art & Culture Deptt. Director Pu R. Hmingthanzuala, Official te, Mizoram Librarian Association lam hotute, Sakawrtuichhun Local Council teh leh NGO hrang hrang hruaituten an hmanpui a ni. 

Sakawrtuichhun YMA Library Building thar hi Art & Culture in RajaRam Mohan Roy Library Foundation atanga an pawisa hmuh Rs. 6,00,000/- senga sak niin, thla 5 chhungin an sa zo thei a ni.