Ni thum awh tur Bharat Nirman Public Information Campaign chu Pu Hmingdailova Khiangte, Chairman Mizoram Youth Commission & MLA Tuirial Constituency chuan vawiin khan Thingdawl Community Hall-ah a hawng ta. Hawnna thu sawiin UPA sawrkarin scheme hrang tamtak hmanga thingtlang mipui te chawikan a tum hi a ropui takzet a, chung scheme chhawr theia India ram bung khat kan lo nive hi kan vannei hle a ni, a ti.

Pu Khiangte chuan India sawrkarin thingtlang tih hmasawn nana scheme hrang hrang a neihte sawiin heng - mi rethei In sak sak te, tui thianghlim laksak te, thingtlang khaw tin inkalpawhna siam te, thingtlang Electric-a thlunzawm te, Telephone-a thlun pawh leh Irrigation siam te hi a chhawrtute kan ni mek a. Central flagship programme MGNREGS phei chu kan khawsak nawm phah ta hle a ni, a ti a. Amaherawhchu mizoten kan hnathawh kawngah kan zawmthawt phah em tihtur khawpin kan kalpui dan hi bihchian a ngai a, Mizote thinlung ngaihtuahna tichhetu a ni ang tih ka hlau hle a ni, a ti a ni. Tuna Mizoram Sawrkar flagship programme NLUP chu a taima ten a rah an seng chho mek a. Hetiang khawpa policy tha hi Central pawhin thuk taka a tuipui mek leh state dangte pawhin tih ve an chak em em a ni a. A dawngtu mipuiten mawhphurhna kan nei lian ta hle a ni, tiin hna thawh nana kan pawisa dawn hi a hmanna tur nilova kan hman chuan Rukru kan ni tih inhria ang u, Pu Hmingdailova Khiangte chuan a ti a ni.

Pu Mangjangam Touthang,IIS, Chairman, Core Committee, PIC chuan Campaign hawnna hi a kaihruai a. Thuhma sawiin tun hi Kolasib District –ah a tum thumna a ni a. Kum 2006 atang khan UPA sawrkar chuan mipui dawmkan nana scheme a duante hrilhfiahna hun hi a hmang tan a, thingtlang mite hmasawnna tur hi sawrkar chuan a ngai pawimawh hle a ni, a ti.

PIC neihna hmunah hian State leh Central Deptt. hrang hrangten an hnathawh tarlanna Exhibition an nei a. Health Deptt. lamin Health Camp an buatsaih bawk a. Hetah hian doctor rual in damlo engemawzat a thlawn in an en nghal a ni.

Technical session chhawng hnih neih zui nghal a ni a, Department mithiam ten an hnathawhte sawiin mipui ten zawhna an zawt bawk a ni.

PIC hi Nov. 8 thleng neih chhunzawm a ni ang a. Hetih chhung hian naktuk leh tuk lehah te Hortoki leh Khamrang ah Campaign hi nei bawkin Health Camp te neih a ni dawn a ni.