2076/2022-2023
Aizawl the 27th September 2022 : Mizoram Youth Commission Chairman Dr. Vanlaltanpuia chuan Dt.26.09.2022 Thawhtanni khan Mizo Zirlai Pawl Pune te'n zirlai thar te puala an buatsaih Freshers' Day 2022 chu Khuallian niin a tel pui. He programme hi Maulana Abdul Kalam Hall, Koregaon Park ah hman niin zirlai leh hnathawk a awm te thahnem tak an fuankhawm ani. Hun rei tak hetiang program lian hi Covid19 hrileng avanga neih theih anih loh hnuah hman leh vawikhatna anih avangin zirlai ten an hlut hle.

Zirlai kalkhawmte hmaah thusawiin Dr. Vanlaltanpuia chuan hun rei tak ata tawh Pune chu Mizo te tana zirna hmun pawimawh anih thu leh mizo te tana khawpui pawimawh ber zing ami ani a ti a. Mizo Welfare leh Zirlai Pawl te'n tlawmngai taka heng zirlai leh hnathawk rawn kal te an lo uapkhawm thin leh Mizo te tana inpui an lo siam sak thin chu lawmawm a tih thu a sawi a. He an nundan ze mawi tak hi chhunzawm zel turin a chah ani. Tin, zirlai te chu chhungte hmuh phak lova awm an nih avangin an nun in uluk leh zual turin a chah bawk a ni.

Tunhnaiah UPSC in All India Service exam a buatsaihah Mizo thalai te kan che tha lo hle mai hi thil zahthlak tak ani. A bik takin IAS ah phei chuan kum 8 chhung kan lang ta lo hi in enfiah kan ngai takzet ani a ti. Hetiang anga kan kal zel anih chuan kan hnamin kan tawng tur hi a chhuanawm lo hle dawn ani. Professional Courses All India level entrace test heng - SSC, CDS, JEE, NEET, CAT, etc.ah pawh kan titha lo hle bawk te hi a hnam ang pawhin a zahthlak hle a, zirlai te'n tumruhna nen tan la a chona thar hmachhawn tura inbuatsaih theuh turin a chah ani. Tum nei rana an zirna theuh kalpui nawn leh turin a chah ani.

Khualzahawm atana sawm Pu. Lawmnakima, Managing Director Ernst & Young Bangalore, Mizo fate zinga IT lama thleng sang ber zing ami tuna US Company a Manager hna thawk mek pawhin a hlawhtlinna thuruk leh a thawhrimna kawng zawh te ngaihnawm takin zirlai te fuihna'n a sawi ani. Ziathiam Hriatrengi Lilac (MYC Perhkhuang) in kalkhawmte zaiin a awi bawk ani. MYC Chairman hi a nupui H. Lalremruati'n a tawiawm ani.