Chief Commissioner for Persons With Disabilities (PWD), Pu Prasanna Kumar Pincha chuan vawiin khan Social Welfare Department leh Mizoram-a Persons with Disabilities Commissioner office- a mawhphurtute nen State Guest House Conference Hall-ah meeting an nei.

Pu Prasanna Kumar Pincha chuan kum hnih chhung PWD Chief Commissioner nihna a chelh hnu ah rualbanlote enkawl leh an hamthatna tura dan siam Persons With Disability (PWD) Act, 1995 chu State hrang hrang ten eng chen chiah nge an kalpui a, a nihna tur takin an kalpui em tih leh he dan kengkawh turin harsatna an neih leh neihlohte enfiah turin a zinkual thin thu a sawi a, Mizoram pawh chutiang tura rawn tlawh chu a ni, a ti. PWD Act in a phut angin rualbanlote chu sorkar hna ruak awm zawng zawngah 3% hauhsak an nih ang ngei a dik taka kalpui tul a tih thu te, a bikin hmeichhia rualbanlote tan hamthatna scheme thar ngaituah tul a tih thu te, rualbanlote pension lak zat tihsan leh midangte ang bawka zirna tha an neih theihna tur ngaihtuahsak te a ngaihpawimawh thu a sawi.

Mizoram hmun hrang hrangah vawi engemawzat Social Welfare leh PWD Commissionerate hmalakna-a rualbanlote tana special assesment camp an buatsaih thei chu Chief Commissioner hian lawmawm a ti hle a. Heng assessment camp-ah hian Mizoram hmun kilkhawr zawka khawsa rualbanlo te’n hamthatna an dawn ve theihna tur certificate la chhuak tura Aizawl pan kher ngai lovin an khua ah Doctor te’n enfiahin certificate hi an pe nghal thin a ni. Mizoram chu hmarchhak state zingah a ti tha ber pawl a ni nghe nghe.

Chief Commissioner hian Mizoram a cham chhungin sorkar mipawimawh hrang hrangte bakah rualbanlote, tlawmngai pawlte leh thuthar lakhawmtute a kawm ang.

Vawin meeting-ah hian Social Welfare Secretary Pu Lalrinliana Fanai, Person With Disabilities Commissioner Pi B.Sairengpuii leh officer dangte an tel a ni.