Mizoram sawrkar hnuaia People with Disabilities (PWD) Commissioner Dr Lalnunthara chuan Lawngtlai tlawhin, vawiin khan Govt Lawngtlai College-ah rualbanlote tana sawrkar hma lakna chungchang zir hona hun a hmanpui.

Govt Lawngtlai College (GLC) Hall-a he hun buatsaih hi GLC Principal Pu T. Thangthuama chuan kaihruaiin, zirtirtu leh zirlai eng emaw zat an kal khawm a. Hun hmangtu PWD Commissioner Dr Lalnunthara chuan rualbanlote dikna leh chanvo tar lanna leh humhalhna dan "The Rights of Persons with Disabilities Act, 2016" chu sawi fiahin, Mizoram sawrkar hnuaia rualbanlote'n a bika enkawl theihna chanvo hrang hrang an neihte a sawi fiah nghal a. Kum 2011 census angin Mizoramah rualbanlo mipa 8198 leh hmeichhia 6962, an zavaiin mi 15160 an awm thu a tar lang bawk.

Dr Lalnunthara chuan rualbanlote'n hma an lo sawn zel theih nan leh an chanvo an hriata an chan theih nan PWD Commissioner office chuan theih tawp a chhuah thin a, Mizoram sawrkar chuan tunah hian rualbanlote chanvo leh humhalhna dik taka kalpui a nih theih nan committee din ngaite pawh a din vek tawh a ni, a ti a. Hemi zarah hian rualbanlo eng emaw zatin hamthatna an dawng tawh a, sawrkar hna pawh mi 60 velin an hmu tawh a ni tiin, zirna sang zawk an zir theih nan rualbanlote tan seat 5% hauh (reserve) a nih thu leh kum lamah pawh kum 5 thleng ngaihhnathiam theih an nih thu a sawi.

Dr Lalnunthara chuan zirna in hrang hrangah rualbanlote chu mi pangngai nen en hran bik tur an nih loh thu sawiin, sawrkar department hnuaia hna thawk rualbanlote'n harsatna emaw lungawi lohna emaw an neiha an thlenna tur Grievance Redressal Officer ruat an nih thu a sawi a. Agriculture lama hma lakna leh development programme hrang hrangah rualbanlo hmeichhiate chu duhsak bik tur an nih thu a sawi bawk.

Dr Lalnunthara hian vawiin vek khan Lai Autonomous District Council (LADC) hnuaia official-te pawh kawmin, District Council hnuaia rualbanlote'n an chanvo an chan ngei theihna tura state sawrkar nen an kalphung a danglam chuan loh thu te, state sawrkar mai bakah central sawrkar te nen pawh rualkhai taka an kal mek dan te a sawipui a. Rualbanlote'n an dikna leh chanvo an neihte a nihna ang taka an chan theih nana theih tawp chhuahpui zel turin District Council official-te chu a ngen nghal bawk.

PWD Commissioner Dr Lalnunthara hian vawiin vek khan Siaha a pan leh nghal a. Naktuk khian Govt Siaha College leh Mara Autonomous District Council (MADC)-ah te hun a hmang ve leh dawn a ni.