2700/2024-2025

25th October, 2024 : Vawiin chawhnu khan PWD Engineer-in-Chief (E-in-C) Er. Lalrinkima Hnamte chuan Tlawng Lei, Reiek kawng ami chu mipui hman theihin bridge site, Reiek kaiah a hawng.

PWD E-in-C in a hawn tak Tlawng Lei hi metre 55 a thui niin metre 12.2 (40.6 ft) a zau a ni a. Lirtheiin a zawh tur chin hi metre 7.5 a zau a ni a, a sir ve ve ah hian ke a kalna tur metre 1.2 a zau siam niin Lei san zawng hi metre 7 a ni.

Tlawng Lei hi a project hming chu "Construction of PSC Bridge (40m) over R. Tlawng on Aizawl to Reiek - W. Lungdar Road at km 14.80" a ni a. Central Road Fund kaltlangin MoRTH in cheng nuai 757.56 a rawn pe a, February 28, 2017 ah lei dawh hna thawh tan a ni a, thla 24 chhunga thawh zawh tura tih a nih laiin June ni 12, 2017 ah ruah nasa taka a sur vangin Tlawng Lui kuang chim san ber anga chhinchhiah thin (HFL) chu metre 5.05 in a chim pel a, hei vang hian Lei hi a tira ruahman aia tih san a nih loh chuan hun lo kal zel turah a him lo dawna hriat a ni a. Hetiang a nih vang hian a design leh specification thlakin a tira ruahman aia thuiin siam that a ni a, MoRTH thurawn angin sanction amount chhunga awm turin Pre-Stressed Concrete (PSC) Bridge chu Double Lane Built-Up Steel Girder (BUSG) Bridge in thlak a ni.

Lei dawh hna thawk tur hian M/S Satguru Engineers & Allied Services Pvt. Ltd. Guwahati thlan a ni a, ton 70 a rit dawl thei tura duan a ni a, PWD hotute chuan Lei hi a tlo zawk nan Lei chungah lirthei din phal loh a ni tih an sawi bawk a ni.

Tlawng Lei hawnna inkhawm MS Chenkual Picnic Spot, Tlawngkai, Reiek road-a neihah khuallian Er. Lalrinkima chuan harsatna tam tak paltlang hnuah Tlawng Lei hawn a ni ta chu lawmawm a tih thu a sawi a, hmalak a nih tan tirah fur ruahtui tam vangin ngaihtuahna thar senga Lei dawh hi ruahman that a ngai a, a hnuah COVID hripui leng vangin hnathawh a sawt thei lova, kan tum hunah kan zo thei ta lo a ni a ti a. He Lei dawh thar hian mipuite hnenah hmasawnna chak zawka a thlen ngei a beisei thu a sawi a. Mizoram PWD in kawng km 6000 vela thui leh Lei 129 an enkawl mek thu sawiin, Lei dawh mek 20 a awm thu leh dawh tura ruahmanna siam mek 38 a awm thu sawiin, tluang taka thawh a nih zel theih nan thawktute duhsakna hlanin a fuih a ni.

Tlawng Lei hawnna inkhawm hi Er. H. Zoramliana, Chief Engineer (Highways) in a kaihruai a, Er. R. Lalpeka, Sr. Executive Engineer, Aizawl Road South Division hnen atangin technical report ngaihthlak a ni a, Er. Lalrinngheta, Superintending Engineer, Central Circle-in lawmthu sawiin hun a khar a, Reiek leh Ailawng Village Council member ten he hun hi an hmanpui bawk a ni.