Tunlaia chanchinbua kawng chhe chungchang lo lang thin leh pawl thenkhat hnatlanga kawngchhe siam thin an awm avangin kawng repair chungchanga hnathawh dan te, sum dinhmun te leh thil awmdan tlangpui mipuite hriata tarlan tula a hriat avangin Public Works Department Engineer-in-Chief leh Secretary ni bawk Er. Liansanga chuan vawiin khan Press mite a pisaah a kawm.

E-in-C in a tarlan danin Mizoram sorkar enkawl State Roads te hi a repair na leh enkawlna hna zawng zawng State suma thawh a ni a, sum indaihlohna a nasat em avangin duh angin kawng hi a tha theilo a ni. Ministry of Road Transport & Highways Norms anga chhutin kum khatah cheng vaibelchhe 159 State kawng te enkawlnan an mamawh laiin 2010-2011 chhunga State Budget a kawng maintain-na tur dah chu cheng vaibelchhe 5.77 chauh a ni a. National Highway te erawh chu sorkar laipui ta niin a enkawlna senso zawng zawng pawh anmahni tum a ni a, a thawh dan pawh Central sorkar dan anga kalpui a ngai a ni. PWD kuta awmsa National Highway dangte a that thawkhat viau laiin BRO kut atanga an lak National Highway 54 erawh chu duhthu a sam lo hle a. Hei hi Central sorkarin PWD hnena hlan chhawng tura order a siam hnuah kum 2 chhung zet an kuta hlan lovin BRO ten an enkawl zui a. Chutih chhung chuan a chhiat belh nasa hman hle a, Estimate siam a, Sanction dil phawt a tul bakah, Contractor tharte thlan fel a labour leh khawlte a thara ngaihtuah vek a ngaih avangin PWD in pangngai takin hna a la thawk thei lova. Black topped hna hi fur laia thawh theih a nih loh avangin hna thawk tak tak tur chuan thal nghah leh phawt a tul a ni, tih E-in-C hian a sawifiah a.

Kawng chhiat na chhan tam tak zingah Truck phurh rih zawng phal chin pela Driver ten an duh zat zat an phur mai thin hian Mizoram kawng a tihchhiat nasat thu E-in-C hian a tarlang a. Kawng hi Truck phurh rih zawng phal chin dawl zo tura duan a nih avangin Over-loaded truck avang hian kawng a chhe hma em em a ni, a ti a. E-in-C chuan Truck in a phurh phal chin aia tam a phurh avanga bungraw phurh man tlawmna aiin kawng a tihchhiat avanga bungraw man to na leh mipui tawrhna a tam zawk daih tih hria a Truck Driver te pawhin dan phal chin bak phurlo thei se a duhthu a sawi a. Mizoram kawngte hi PWD ta ni lovin Mizoram mipuite ta a nih avangin uluk taka a chhiat lohna tura venpui turin mipuite a ngen a ni.