Vawiin nileng khan ni hnih awh tur Mizoram PWD hnuaia hna thawh mekte thlirhona hun chu Engineer-in-Chief Conference Hall, Aizawlah tan a ni a. Meeting ah hian PWD Minister Pu Lal Thanzara chu khuallian a ni.
Pu Lal Thanzara chuan ruah nasa tak sur karah tui lian, in chim leh kawng min avanga harsatna nasa tak Mizoramin a tawh mek laiin PWD thawktuten mipui harsatna sutkian tuma taima taka hna an thawk chu lawmawm a ti a, kawng siam hna thahnemngai taka an thawh vanglaia an hna ti sukuk thei tura ruah tui tam tak a tla chu pawi a tih thu a sawi. Mizoram Chief Minister leh Finance Minister-te hmalakna a zarah NEDP atangin sum mamawh engemawzat hman theih tura buatsaih mek niin hei hian an hnathawh zelna tura harsatna awm thei tam tak a sutkian a beisei thu PWD Minister chuan a sawi a. Thingtlang khaw inkalpawhna kawng siamna scheme PGMSY bikah kumkaltaa review meeting an neih leh tun inkara ruahmanna an siamte eng ang chiahin nge an bawhzui tih enzui a, thahnemngai lehzuala thawk turin PWD a thawktute a fuih a. Kawngpui pawimawhzia kan hria a, mitin mamawh a nih avangin a enkawltuten mipui rawngbawltu an nih hria a, taima lehzual turin a chah a ni.
Meeting kaihruaitu PWD Secretary Pu Lalram Thanga chuan PWD chu Mizoram hmasawnna ruhrel siamtu pawimawh berte zinga mi niin an hmalakna leh inzarpharhna pawh a zau a ni, a ti a. Division then khat an thawh chak viau laiin thenkhat hnu fum deuh te awm theih a ni a, chuvangin hnathawh dan inhrilh a, infuih tawn leh hmasawn an ngaihna lai te inenfiaha, inelna thianghlim siam nan leh inrawnkhawmna atanga ngaituahna thar leh fing zawk a lo chhuah theih nan meeting neih thin a ni, a ti. PWD Secretary chuan langtlang leh mite chhiar theiha hna thawh a pawimawhzia leh chumi atan Central YMA nena thawhhona thutlung pawh siam a nih thu a sawi a. Ram chhunga chhiatna thleng mekah hian a chhan bulpui chhui chhuah ‘root cause analysis’ neih tul a tih thu sawiin engineer-te lakah mipuiin beiseina an neih san zia hre turin a chah bawk a ni.
Review meeting-ah hian PWD hnuaia kawng siam, lei dawh, in sak leh enkawl zui hna thawh mek chungchang te; PWD hnuaia Division hrang hrang 28 hnathawh mek leh hmalakna turte bakah furpui thleng mekin Mizoram hmun hrang hranga chhiatna a thlen mek leh lo la thleng thei hmachhawn dan tur te sawiho a ni.
