Sawrkar Laipuia Bharat Nirman Programme hnuaia mihring 250 aia tam chenna khua chin kawngpuia thlunzawmna tura hmalakna Pradhan Mantri Gram Sadak Yojana (PMGSY) hmanga Mizoram PWD-in hma a lak dan thlirletna chu vawiin nileng khan MOS Pu Lal Thanzara i/c PWD etc. hovin E-in-C Conference Hall, Tuikhuahtlang ah PWD officer ten an hmang.
Review Meeting hmanpuitu Pu Lal Thanzara chuan Mizoram hmun hrang hranga PMGSY scheme hrang hrang kalpui mek ah hmun tam takah hna tluang taka kalpui a nih laiin hmun thenkhatah harsatna chi hrang hrang PWD-in a tawh thu te a tarlang a. Chung harsatna ah contractor te mawhpuh mai lova uluk lehzuala an hnathawh dan vil thin turin supervision thawktu PWD officer kalkhawmte chu a chah. Hmun thenkhatah hun bituk chhunga hna thawh zawh lohva hun rei tak hman a ni thin chu pawi tiin Minister chuan a nghawng khaw mipuite an zahawm a, contractor pawh a tul chuan thlak dan kawng zawn mai tha a tih thu a tarlang bawk. PWD chuan ram tana pawimawh - kawngpui siam, building sak, leihlawn siam hna te an thawh thin chu neitu rilru pu chunga tha taka hlenchhuak zel tura inpek a tul thu sawiin thahnemngai taka thawk thin turin a chah bawk. Hmasawnna ruhrel hna thawh nan PWD kutah sum tam tak awm thin chu thlemna a nih theih thu te sawiin PWD hotu rualte chu fimkhur taka thawk thin turin a fuih a, kut tling lova sum neih chuan nun hlimna a thlen lova, taksa leh thlarau tan chhiatna a thlen zawk thin a ni, a ti. A hmuna hna viltu J.E. leh S.A. te thawhrimna azarah kawngpui tha kan nei thei a ni tiin Sawrkar aiawhin an hnenah lawmthu a sawi bawk.
Pu Lalramthanga, Principal Secretary, PWD pawhin PMGSY nihphung te a sawifiah a, Mizoram tlangramah chuan kawngpui chauh inkalpawhna kan neih avangin kawngpui tha neih a pawimawh lehzual a ni, a ti a, PMGSY chu tun aia hmang tangkai lehzual turin PWD hotute chu a chah bawk. Thingtlang inkalpawhna kawngpui neih thatah Mizoram chu a nei tha pawl tak kan ni tiin Review Meeting chu hmasawn zel nana hmang tangkai thiam turin a fuih bawk. Contractor ten hna an thawh that leh that loh chu PWD mawh a ni tiin Pu Lalramthanga chuan supervision kawngah thahnemngai lehzuala tan la turin a chah bawk a ni.
Review Meeting ah hian Pu R.Vanlaltluanga, E-in-C, PWD leh Chief Executive Officer, MiRRDA chuan Mizoram puma PMGSY hna kalpui mek dan report a pe a, Pu David Sapzova, EE, Quality Control Division leh Pi Lalrinthangi Chhakchhuak, Finance Controller, MiRRDA ten presentation an nei bawk. Division hrang hrang atangin PMGSY hna kal mek te a mal mala thlirletna te neiin a enkawltu EE ten report an pek bakah harsatna an tawh te sawihovin hmalak chhunzawm zel dan tur te an sawiho bawk a ni.
