Vawiin chawhnu khan PWD Minister Pu Lal Thanzara chuan Dinthar Vengah MP Hipheia Road hawnna hun a hmanga, Dr Lalmalsawma Nghaka, Dinthar khawtlang hruaitute leh Party lam mi engemawzahin he hun hi an hmanpui.

PWD Minister Pu Lal Thanzara chuan Sawrkarin hmasawn zel tuma hma nasa taka lak a nih laia vanduaina alo thlen thawm hriattur a awm ve leh zeuh thin chu a pawi hle rualin mithenkhatte chu heng harsatna avanga lawm zawk ang hial a an awm thin hi a pawi lehzual a ni, a ti a, thil tha tamtak fak tlak leh chawimawi tlak a awm laia a chhe lai chiah kan sawi uar thin hi in siamthat kan ngaihna niin a lang, a ti. Sawrkar hmalakna hrang hrang kal mekte tarlangin Mizoram Institute of Medical Education and Research ah Academic year 2018-19 hian MBBS zirna tan tura ruahman fel a nih tawh thu a sawi a, Mizoram tan seat Zaa Sawmsarih lai dah a nih thu a tarlang bawk. Minister chuan zin miten harsatna an tawh loh nan kawng siam hna hmun hrang hrangah kalpui mek a nih thu a tarlanga, Hmun engemawzahah Lei siam that hna chak taka kalpui mek a nih thu a sawi bawk.  Pu Lal Thanzara chuan MP Hipheia Road chu hlawhtling taka siam zawh a ni chu lawmawm a ti a, khawtlang tanrualna leh thawhhona chu a fakawm tiin tangkai taka hman atan MP Hipheia Road chu a hawng a ni.

MP Hipheia Road hian Dinthar Veng Thlanmual kawng atangin Kanan Veng panna kawng a pawh chho a ni.