93/2025-2026
Lawngtlai, 8th April 2025 : Vawiin khan Pu Vanlalhlana, PWD Minister chuan Kaladan Multi-Modal Transit Transport Project (KMMTTP) leh PMGSY III ROAD, Diltlang 'S' - Chawngte 'P' kawngpui sial mek chu a hmunah kalin a enfiah. Minister hi Pu Lalfamkima, Dy. Speaker, Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA ni bawk bakah Pu T Lalhlimpuia,Lunglei West bialtu MLA, leh Pu C. Ngunlianchunga, Lawngtlai West bialtu MLA ten an tawiawm.
Pu Vanlalhlana chuan Kaladan Multi-Modal Transit Transport Project (KMMTTP) chu kawngpui pawimawh tak a nih avangin uluk leh duat taka enkawl a tul hle a ti a. KMMTTP chhak lama NHIDCL ten NH-54 kawngpui an laihah lei vung an paih fimkhur tawk loh avanga harsatna awm thin chu veiawm a tih thu a sawi a. Tun dinhmunah hmun thenkhata kawng tlabal leh chhezual lai chu chak taka siamthat mek a ni chu lawmawm a tih thu sawi a. Sawrkarin kawng tha a ngaipawimawh tih tarlangin, kawngpui siamthat hna thawktu ABCi - te pawh tha leh rintlak taka hnathawk tura chahin, KMMTTP Road enkawl mektu MPWD te pawh theihtawp chhuah turin a chah nghal bawk.
PWD Minister hian PMGSY III ROAD, Diltlang 'S' - Chawngte 'P' pan nghalin, Diltlang 'S' khuaten an lo hmuak a. Hetah hian thu tawi sawina neiin, Pu Vanlalhlana chuan sawrkarin kawngpui tha neih a duh avanga a hmun ngeia lokal a nih thu sawiin, khawltangin an lo hmuahnaah lawmthu a sawi a. Diltlang 'S' khuaten kangmei nasa tak an tuar chu thinlung taka a tawrhpui tih sawiin, Kangmei tuarte tan hian tanpuina cheng 10,000 a hlan nghal a ni. Pu Vanlalhlana chuan PMGSY III Road, Diltlang 'S' - Chawngte 'P' hnathawk mektu Contractor- te chu an hnathawh uluk tur te, mipuite mamawhna hriaa, tha leh rintlak taka hnathawk turin a chah a ni.
Minister hi Er. H Zoramliana, Engineer in chief (PWD) Er. David Sapzova, Chief Engineer (Roads), Er. Hrangthanga Zote, Chief Engineer (Building), Er.Robin Lalrinawma, Chief Engineer ( Highway), Er. Lalchhandami, Chief Architect (PWD) leh Official dangten an tawiawm bawk.
