1091/2024-2025

Aizawl dated 6th July 2024: Vawiin khan Pu Vanlalhlana, Minister, Public Works Department chuan Lengpui a MHIP Day lawmna chu khuallian niin a hmanpui a. Pi H.Lalrimawii, Vice President, Lengpui Branch chuan hun kaihruaiin MHIP Day vawi 50-na ah hian thupui ah 'Mizo Hmeichhiate incheina' tih hman a ni.

PWD Minister Pu Vanlalhlana chuan Mizoram chhung a khaw pawimawh tak, Lengpuiah MHIP Day pual a hun an buatsaih a khuallian a an sawm chu lawmawm a tih thu a sawi a. Hmeichhiate mai ni lo, chhungkua leh khawtlang tihmasawn tur a hma latu pawl pawimawh tak chu MHIP hi an nih thu Minister chuan sawiin Mizoramah chuan eizawnna, zirna leh infiamna ahte pawh hmeichhiate hi hmahruaitu ah an tang fo thin hi entawntlak a tih thu a sawi. Kumin MHIP Day thupui 'Mizo hmeichhiate incheina' hman a ni chu ram leh hnam humhalhna atan thupui pawimawh tak a nih thu Minister chuan sawiin mahni hnam ziarang chawisan nan leh humhalh nan mizo puan leh kawr te hak uar zel turin kalkhawmte a chah. Pu Vanlalhlana chuan khawtlang nuam leh hmasawn siam tur chuan ruihhlo lak a fihlim a tul thu a sawi a, ruihhlo chu hnam hmelma lian tak a nih thu sawiin ruihhlo lak a fihlim pawimawh zia zirtirna uar zel turin a fuih bawk a ni.

MHIP Lengpui Branch buatsaih a MHIP Day pual a hun hmanna ah hian khawchhung tihfai hnatlang te, mi harsa tanpuina tur a bawm dawh te, Lengkhawm zai, Parlam, Chheihlam leh Futsal a inelna te neih niin Member boralte sunna hun hman a ni a. Lengpui Community Hall-a hun hmanna ah hian khawtlang leh tlawmngai pawl hrang hrang hruaitute an tel bawk a ni.

PWD Minister Pu Vanlalhlana chuan Sihhmui a lei dawh mek, 'Construction of Steel Arch (Semi Through) Bridge over River Tlawng on NH 44A/108' chu a hmun ah a endik a. Mizoram tan a inkalpawhna pawimawh tak a nih angin zin mite leh he kawng paltlang khaw mipuiten harsatna an tawh loh nan lei dawh hna chu rintlak tak leh a hun tak a zawh tum turin thawktute a chah a. Lei dawh hna endikna hmun ah hian Er. Robin Lalrinawma, SE Highway Circle, Er. PC David Lalrinliana, Sr.EE leh  Er. R.Lalthanmawia, Sr.SDO leh contractor Poddar Manager leh PWD-a thawktu dangten PWD Minister hi an tawiawm a ni.

'Construction of Steel Arch(Semi Through) bridge with concrete deck 90 m over River tlawng on NH-44A/108 in Mizoram' hi Poddar infractech Pvt. Ltd, Delhi ten a hna hi an thawk a. Kum 2021 March 27 atang khan hna hi thawh tan niin kum 2 chhung a thawh zawh hman tur a ruahman a ni a, hrileng avanga harsatna hrang hrang avangin a hun tak ah peih fel hman a ni ta lo a ni.

Tun dinhmun ah lei dawh hna hi 81.21% vel zo tawh ang a chhinchhiah niin lei hi remkhawm fel a nih hun ah lui dung ah hian pawh kai tur a ni ang a, August 2024 chhung a zawh fel hman beisei a nih thu thawktute chuan an sawi. Lei dawh zawh hian kawng siamthat leh a ngaih dawn avangin October 2024 chhungin lirthei tlan thei a buatsaih hman beisei a nih thu sawi a ni bawk.