3697/2023-2024
Aizawl, the 6th February, 2024: Vawiin chawhnu dar 2:00 khan Public Works Department (PWD) Minister Pu Vanlalhlana chuan Mizoram PWD hmalakna pawimawh tak Quality Control, Research and Development Division, Zuangtui chu tlawhin hmalaknate a enfiah.

Pu Vanlalhlana chuan PWD Minister a nih veleh atangin hna tha leh tlo siam kawnga pawimawh ber 'Quality Control' chu ngaih pawimawh hmasaka a neih thu leh PWD Office zinga tlawh hmasak bera a neih chhan pawh a ngaih pawimawh zia lantirna a nih thu a sawi a. PWD hnuaia hmalakna peng pawimawh tak Quality Control, Research & Development Division chu tun aia changtlung, pawimawh leh tha zawka kalpui a duh thu sawiin, thawktu indaihlohna leh mamawh angte pawh a tul dan anga ngaihtuah zel a nih tur thu a sawi bawk.

PWD Minister chuan inkaihhruaina siamte tha taka zawm chunga sawkar kaltlanga in sak, kawngpui siam leh hnathawh dangte puitlin a nih theih nan theihtawp chhuah a tul thu sawiin, PWD hmalaknate chu quality tha leh tlo, chhawr tlak ngei a nih theih nana thahnemngai taka thawk turin mawhphurtu zawng zawngte a fuih a. Sawrkar hnuaia hmalaknate chu entawntlak leh chhuanawm tak a nih theih nan enzui leh vil that a tul thu a sawiin, hemi tur hian insakna, kawng siamna leh hnathawhna dang reng reng atana hmanraw lakkhawmte chu a remchan dan ang zela uluk taka enfiah thin turin a chah bawk.

He hunah hian Er. Laltlanthangi Ralte, Sr. EE, Quality Control, Research & Development Division-in inhmelhriattirna a nei a. Division hnuaia thawktu leh hmaraw neih dante bakah harsatna tawh leh mamawh an neihte Minister hnenah hian a thlen a ni.

Inkawmhona hun hman zawh hnu hian PWD Minister chuan insakna, kawngpui siamna leh PWD kaltlanga hmalakna hrang hranga hmanraw hman thin Cement, Balu, Lei, Rod, Bitumen, Cement Mix, Building foundation zawh chin leh adangte endikna hmunpui November ni 1, 2002 a hawn Central Laboratory tlawh nghalin hmalaknate a enfiah a. Thawktute'n khawl hrang hnathawh dante lo hrilhfiahin mamawh an neihte an lo thlen a. Mamawh angte a tul anga ngaihtuah zel a nih tur thu leh Laboratory chuan a din chhan ang ngeia dan siamte tlawhchhana hma a lak zel a beisei thu a sawi a ni.

PWD Minister chuan Quality Control, Research and Development Division hnuaia SA Training Centre, puakthei thil dahna leh bitumen chhekkhawlna hmunte pawh tlawh nghalin hmalak dan tlangpui a enfiah nghal bawk.

PWD Minister Pu Vanlalhlana hi Er. Gladys Hlychho, SE, Monitoring, E-in-C Office leh department official dang te'n an an tawiawm a ni.