887/2024-2025

Aizawl, 21.06.2024: Minister Pu Vanlalhlana chuan vawiin chawhma khan Z.N. Higher Secondary School, Bawngkawn in 6^th Inter School Swimming Competition a an school in medal an lak lawmna puala programme Bawngkawn South YMA Hall-a an buatsaih chu khuallian niin a hman pui.

Minister chuan naupang leh thalai zinga tui hleuh thiam tak tak an awm chho zel chu lawmawm a tih thu sawiin, medal latute chu a lawmpui thu a sawi a. Ei leh in a that chhoh zel avangin leh hmanruate a that chhoh zel avangin Mizoram chu infiamna khawvelah hma a sawn zel thu leh, sawrkar pawhin infiammi te tan theihtawp a chhuha zel tur thu a sawi. Infiamna leh zirna kal kawp theilo anga ngaihdan awm thin chu thlak tha a tih thu Pu Vanlalhlana hian a sawi a. Khawvel a infiammi hmingthang tak tak zingah zirna degree sang tak tak nei tel an awm thu te sawiin, zirna ngaihthah chuang lovin tumruh tan chuan thil pakhat chauh ni lovah hlawhtlinna a hmuh theih thu a sawi. Minister Pu Vanlalhlana chuan zirlai khakhawm te chu ruihhlo laka fihlim tlat turin a chah bawk a ni.

6^th Inter School Swimming Competition hi Mizoram Aquatics Association buatsaih a ni a. Z.N. Higher Secondary School atang hian zirlai 17 telin, Gold Medal paruk leh Bronze Medal pakhat an lak bakah an zirlai pakhat chuan Open Category ah Gold a la bawk a. Senior Category ah champion in, Junior category ah 1^st runner up an ni bawk.