3770/2023-2024

2024 Ramtuk thla ni 10: Mizoram Sawrkara Public Works Department (PWD) Minister Pu Vanlalhlana chuan vawiin khan Mizoram PWD hnuaia Kolasib District chhunga hna thawh hrang hrang chu a hmunah tlawhin, a enfiah.

PWD Minister Pu Vanlalhlana hi Mizoram Legislative Assembly Deputy Speaker Pu Lalfamkima, Kolasib bialtu MLA bakah, Chief Engineer (Highways) Er H. Zoramliana, Chief Engineer (Roads) Er Lalzarliana, PWD Kolasib Division leh National Highway Division-III hnuaia official-te leh party hruaitute'n an ṭawiawm a. Hna hrang hrang an ennaah hian contractor-te'n lo dawngsawngin, an hna thawh chin an lo hrilhfiah a. Minister chuan hna thawktu contractor-te chu ṭha tak leh chak zawka hna thawk turin a chah a ni.

Bairabi PWD IB-a inkawm hona hun buatsaihah Minister Pu Vanlalhlana chuan sawrkar thar a lo piang a, mipuiin beiseina an nei sangin, mipui an hlim tih sawiin, ram tan a ṭha thei ang ber thlen an tum thu a sawi a. Ministry-in mipui thlawpna an dawng tih an hriatnain a thahruiin, chakna a pe tih sawiin, thawh hona ṭha tak nen hmasawnna hmuh tur a awm zel dawn tih a sawi.

Deputy Speaker Pu Lalfamkima chuan PWD Minister-in Kolasib District tlawh a, hna hrang hrang a hmun ngeia a en chu lawmawm a tih thu sawiin, lawm thu a hrilh a. Kawng ṭha nei turin sawrkar ram lak tawh chhuahsan chungchangah mipuite thawhpuina leh thu awihna a pawimawh tih sawiin, mipuite chu ṭha taka sawrkar hma lakna thlawp turin a chah a. Sawrkar hotute'n ṭhahnem ngai leh ṭha takin hma an la chho dawn tih sawiin, an hma lakna ngaichang thiam turin mipuite chu a chah a ni.

Bairabi-ah hian khawtlang hruaitute leh mipuite'n Minister leh Bialtu MLA hnenah hian an mamawhte an lo thlen a. Hortoki-ah pawh khawtlang mamawh hrang hrang sawi hovin inkawm hona hun hman a ni bawk.

Minister hian PWD NH Division-III hnuaia hna thawh hrang hrang - ₹ nuai 5,310 senga NH-154/6 Kolasib - Bairabi kawngpui (km 89/00 - km 105/00) siam ṭhat leh zauh hna thawh mek te, ₹ nuai 1,111 senga Bairabi bul Tlawng kam ven himna tur river training work Phase-I hna thawh mek te, ₹ nuai 4,136 senga Meidum to Hortoki kawng Phase-I (km 0.00 - km 9.10) siam hna thawh mek te; PWD Kolasib Division hnuaia ₹ vaibelchhe 133.66 senga Meidum to Hortoki kawng Phase-II (km 9.10 - km 26.00) siam hna leh lei (bridge) dawh hna thawh mek leh Rengtekawn to Bawktlang Sub-Station kawng siam ṭhat hna thawh tur te a en a. He'ng hna chungchanga harsatna awmte chu department hotute nen sawi hovin, hma lak chhunzawm zel dan tur sawi ho a ni a. Kawng siam hna leh lei (bridge) dawh hna thawh chhunga mipui veivakte'n harsatna an tawh lohna tur leh fur ruah tui tlak huna harsatna a awm loh nana ruahmanna te sawi ho a ni bawk.


Meidum to Hortoki kawng siam hna Phase-I (km 9.10) hi physical work 79.49 thawh zawh tawh a ni a. Phase-II (km 16.90)-ah earthwork leh permanent work package 4 awmin, 91% thawh zawh tawh a ni a, pavement hna thawh ṭan mek a ni a. Lei dawh tur pali awmin, Chhimluangte lui leh Dumkhel lui kaina lei dawh hna chu 23% ve ve thawh zawh tawh niin, Bulung lui leh Damdiai lui kanna lei dawh tur pawh thawh ṭan mek a ni.

Bairabi-a Tlawng lui kam ven himna tur river training work Phase-I chu Group 4-ah ṭhen niin, Group-I, Group-III leh Group-IV chu thawh zawh tawh a ni a, Group-II la thawh mek niin, 89.01% thawh zawh tawh a ni.

Attachment

  • Loading attachment...