Vawiin khan PWD Minister Pu Lal Thanzara hovin Engineer-in-Chief’s Conference Hall Tuikhuahtlangah Public Works Department chuan an hnathawh thlirletna leh hmalak zel dan tur sawihona review meeting nimin atanga neih chu an chhunzawm a. Meeting ah hian PWD Minister Pu Lal Thanzara chu Chairman niin Pu Lalram Thanga IFS, Principal Secretary PWD leh Pu R. Vanlaltluanga Engineer-in-Chief PWD te chu Co-Chairman an ni.

Review Meeting-ah hian officer ten hnathawhnaa harsatna an neih hrang hrangte Minister leh  department hotute hnenah thlenin chak zawka hmasawn theih dan tur leh harsatna sutkian dan turte an sawiho a. E-in-C  Pu R. Vanlaltluanga chuan PWD hnathawkte chu fuihin hna reng reng mahni mimal hna anga thahnemngai taka thawk tur leh Contractor ten tha tak leh chak taka hna an thawh theihnan a tul ang zela enpuia hmalakpui turin a chah a ni.

Review Meeting hi nimin atanga neih tawh niin nikhatnaah PWD hnuaia Highways bik hnathawh enletna leh hmalaknate sawihona neih a ni a, vawiinah hian Roads leh Buildings Division hnuaia hnathawhte thlirletna neih a ni . Vawiin Meeting-ah hian Engineer-In-Chief, Chief Engineer-te, Chief Architect leh a hnuaia thawkte, District hrang hranga S.E, E.E leh A.E leh hnathawktu dangte bakah PWD hnuaia Accounts lam hotute an tel a ni.

PWD hnuaiah hian kawng enkawl mek 6127 km, Lei 127 leh Building 1236 (3098 Units) a awm a. Kawng laih mek 1140 km, Lei dawh lai 9 leh In sak mek 58 a awm a ni.