No.618/2020-2021

Vawiin hian Serchhip DC Meeting Hall ah Bawrhsap Dr. Lalzirmawia Chhangte, IAS hovin District chhunga Quarantine Facility atana ruat hmun hrang hrangte dinhmun leh heng facility te enkawltu tura ruat thlir hova a tul anga siam that an ni.

Dr. Lalzirmawia Chhangte chuan, Covid-19 do beihpui thlakna kal zelah district chhunga mawhphurhna hrang hrang chelhtuten an hnate tha taka an thawh zel avangin lawmthu a sawi a. Tunah hian state dangah Mizoram mi leh sa tam tak tangkhang mek an awm a, heng tangkhang mek te hi rawn haw thei ta se, helaiah an inkhunghranna tur hmunhma fel fai, mamawh engkim nei sa leh thawktu pawh siam fel sa thlap kan lo neih a tul avangin chutiang ruahmanna siam tura inkokhawm an nih thu a tarlang a.  State pawn atanga rawn lut an awmin mahni inah a inkhung mai theih tawh lova, facility ah te chauh hian dahhran tawh tur an nih thu a tarlang a ni.

Vawiina meeting ah hian Serchhip District chhunga hmun 17 a Quarantine Facility ruahmanna leh mawhphurhna hrang hrang chelhtute duan chhinte te chu chipchiar taka thlir ho a ni a, siam that ngai te leh mawhphurtu tlema han thlak hlek hlek ngai te siamthat niin; Final Facility List hi hriattirna a rawn chhuak thuai tura beisei a ni.

Vawiin vek hian Serchhip District chhung mi, state danga tangkhang zawng zawngte dapkhawm a, chhinchhiahna hna Village Level Task Force te nena tangkawpa neih a ni bawk a. Tlai lamah report kimchang hriat mai theih beisei a ni bawk.

Vawiina meeting ah hian SP Pu R. Sathiyasundaram, IPS, Pu HD. Lalpekmawia, MCS, Addl DC leh official pawimawh engemawzat an tel a ni.