No.4394/2020-2021

Vawiin August ni 25, 2020 (thawhlehni) zing dar 9:30 khan Health Directorate Conference Hall-ah Dr.ZR Thiamsanga, Vice Chairman, Health & Family Welfare Board kaihhruaina hnuaiah Quarantine Centre-a awm mek ten vote an thlak ve theih dan tur sawihovin Health Department rualte an thukhawm.

He meeting-ah hian State Election Commission-in Quarantine Centre-a awm ten vote an thlak dan tur chungchanga rawtna thlen tura a tih angin Quarantine Centre-a awm COVID-19 RT-PCR test result negative ten VC/LC Election-a vote an thlak theih dan tur te ngun taka sawiho a ni.

Quarantine centre-a awmte hi COVID-19 incubation period ni 14 awm tura tih an ni a, hetih lai hian RT-PCR result-ah false negative 100 zelah 30 a awm theih avangin negative te pawh hi an quarantine period a la zawh loh chuan an him ngei a ni tih sawi fak theih a ni lo va. Chuvangin Quarantine Centre-a awm zawng zawngte chuan Postal Ballot hmanga vote an thlak theih nan State Election Commission hnenah rawtna thlen nghal ni se ti a relho a ni.

State Election Commission hnena ngaihdan thlenna lehkha hi vawiin 25.8.2020 ngeia buatsaih nghal turin Dr. Lily Y. Chhakchhuak, SPO (RCH)/DD(FW) leh Dr. B.Lalthantluanga, ASIO te ruat zui nghal an ni.

He meeting-ah hian Dr. Thiamsanga, MLA chuan COVID-19 veite dahna hmun CCC te a lo khat chho ta hle mai a. Thawktute pawh nasa lehzuala tan la thar zel turin a fuih a. Health Secretary Pu H.Lalengmawia, IAS pawhin veng hrang hrang hranga Sawrkar Facility awmte pawh COVID-19 veite enkawlna hmun atan notify nghal a a ni ang tih sawiin veng leh khaw hrang hrangte pawh harsatna siam lova sawrkar leh department hmalakna te pawm thiam turin a ngen nghal bawk a ni.