Vawiin chawhma dar 10 khan Parliamentary Secretary, Pu TT Zothansanga, Champhai South bialtu MLA chuan Rabung Playground No. 1 ah Rabung Footbawll Zone Centre thar hawnna leh Zone Championship Tournament hawnna a hmanpui a. Tlailamah Pamchung tlawhin khaw mipuite nen inkawmhona hun tha tak an hmang bawk.

Khuallian, Parliamentary Secretary Pu TT Zothansanga chuan Rabung Footbawll Zone Centre thar hawnna leh Zone Championship Tournament hawnna ah thu sawiin thalai naupang te te a boral kan tam chhan chu ruitheihthil vang a nih thu sawiin infiammi kalkhawmte chu ruitheihthil leh a kaihhnawiha fihlim turin a chah a. Football chu theihtawpa beitute tan eizawnna tling a nih thu a sawi bawk. Parliamentary Secretary chuan Rabung khuain BPL survey kalpui mekah huaisen leh dik taka tehna kalpui a BPL awmlohna khuaa an inchhal thei chu chhuanawm a tih thu leh VAGY Model Village nih a inhmeh hle a ni a ti bawk. Pu TT Zothansanga chuan infiammite fuihin Rabung Zone chu Champhaiah I-Day Tournament-ah an champion chuan siala lawm sak a tum thu a sawi a. Khuallian chuan Rabung field leh Murlen field chei that sak thuai a tum thu leh Zone thar lawmpui nan leh tournament puihna turin Rs. 20,000 a pe bawk.

Rabung Football Zone hi Champhai District Football Association (CDFA) hnuaia Zone 11-na niin he Zone hian khaw panga a huam a. Tuna Rabung Football Zone tournament-ah hian mipa team 12 leh hmeichhia team 7 an tel a ni.

Attachment

  • Loading attachment...