2081/2025-2026

Aizawl, the 4th November, 2025: Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh, PVSM, AVSM, YSM (Retd) hovin vawiin khan Delhi, Lakshadweep, Puducherry, Haryana, Kerela, Karnataka, Madhya Pradesh, Punjab, Tamil Nadu, Uttarakhand leh Jharkhand-te dinchamphahak 'Foundation Day' lawmna chu Durbar Hall, Raj Bhavan, Aizawlah neih a ni.

Larsap General (Dr) Vijay Kumar Singh State leh Union Territory 11 te Foundation Day lawmna Raj Bhavan-a buatsaih a ni chu lawmawm tiin, Prime Minister hmalakna 'Ek Bharat Shreshtha Bharat' chu hnam hrang hrangte inpumkhatna leh inunauna tha siam tura ruahman a nih thu a sawi a. India rama State/UT tin te'n danglam bikna an neih thu sawiin, kan danglamna hi kan chakna hnar a ni a, India ram intodelh 'Vikshit Bharat@2047' ni tura hmalam min pan tirtu pawimawh tak a ni, a ti a. Midangte hnam ziarang, nunphung leh tih dante hriata zah sak a tul thu sawiin, kalkhawmte chu an kalna hmun apiangah mahni state ziarang, nunphung leh tih dante chawilara midangte zirtirtu nih tum turin a chah a ni.

He hun hi Pi Lalhruaitluangi, APS to Governor chuan kaihruaiin programme buatsaih chhan a sawifiah a. Delhi Lt. Governor Shri VK Saxena, Madhya Pradesh Governor Shri Mangubhai C. Patel, Kerela Governor Shri Rajendra Arlekar, Haryana Governor Shri Ashim Kumar Ghosh, Punjab Governor Shri Gulab Chand Kataria leh Puducherry Lt. Governor Shri K. Kailashnathan, IAS (Rtd.) te thuchah ngaihthlaka thirho a ni a. Dr. Alok Shukla (Madya Pradesh), Professor, NIT Mizoram; Dr. Chethan G.E. (Karnataka), Asst. Professor, CVSc&AH; Prof. Rambir Singh (Haryana), MZU; Dr. C. Devendiran (Tamil Nadu), Professor, MZU; Dr. Shuchi (Uttarakhand), Associate Professor, NIT Mizoram leh Dr. Vijay Mandal (Jharkhand), Associate Professor, NIT Mizoramte hnen atangin an State chanchin tawi ngaihnawm tak ngaihthlak a ni.

He hunah hian Lakshadweep, Karnataka, Kerela, Tamil Nadu, Uttarakhand leh Jharkhand-te chanchin tarlanna video hnuhnawm tak tak thlirho a ni a. ICFAI University leh NIT Mizoram zirlaite'n cultural item an nei bawk a. Hemi hnu hian Governor General (Dr) Vijay Kumar Singh leh Lady Governor Pi Bharti Singh te'n hemi puala kalkhawmte hi Upper Lawn, Raj Bhavan-ah kawmin hun hlimawm tak an hmang ho a ni.

Puducherry hi November ni 1, 1954 khan UT ah siam a ni a. November ni 1, 1956 khan Delhi leh Lakshadweep-te chu UT ah siam niin, hemi ni vek hian Kerela, Karnataka, Madhya Pradesh leh Tamil Nadu-te chu state-ah hlankai an ni a. November ni 1, 1966 khan Haryana leh Punjab-te chu siam remin State-ah siam an ni a. November ni 9, 2000 khan Uttrakhand state siam niin, November ni 15, 2000 khan Jharkhand state a piang a ni.

Ek Bharat Shreshtha Bharat programme hian India rama State leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Raj Bhavan, Mizoramah Governor kaihhruaiin June, 2023 atang khan buatsaih tan a ni.