431/2025-2026

Aizawl, the 1st May, 2025: Vawiin khan 'Ek Bharat Shreshtha Bharat' hmalakna hnuaiah Mizoram Larsap General (Dr) Vijay Kumar Singh, PVSM, AVSM, YSM (Retd) hovin Himachal Pradesh, Gujarat leh Maharashtra-te State puitlinga hlankai ni 'Foundation Day' lawmna Durbar Hall, Raj Bhavan, Aizawlah buatsaih a ni.

He hun hmanpuitu Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Prime Minister hmalaknaa buatsaih 'Ek Bharat Shreshtha Bharat' chu India rama hnam ziarang hrang hrangte kan hriat chiana, kan hlut lehzual theih nana buatsaih a ni tih sawiin, Himachal Pradesh, Maharashtra leh Gujarat-te an dinchamphaphak pualin duhsakna a hlan a. India ram mawina leh danglam bikna chu a chhunga hnam ziarang leh nunphung hrang hrang neite lungrual taka kan chen hona hi a ni tih sawiin, "Hmun hran hranah nundan leh tihdan phung a danglam zel a, kan danglamna kan pawm avangin kan inpumkhat phah a, hei hi Vikshit Bharat, Shreshtha Bharat thiltum a ni a, India ram impunkhatna hi ram dangte awhrawn a ni", a ti a. Danglamna nasa tak awm bawk mah se, India rama chenge chu a tul huna lungrual taka ke pen ho thei kan ni, a ti bawk.

He hunah hian Mizoram Larsap chuan state 3 te chanchin tawi tarlangin, Himachal Pradesh chu state mawi leh ngainatawm, hnam ziarang hausa tak nei a nih thu a sawi a. Maharashtra chu state ropui, India ram sum leh pai dehchhuahna hmunpui pawimawh tak, leh chanchin ropui tak nei a nih thu a sawi a. Gujarat state chungchang pawh sawiin, India rama state hmasawn chak leh entawntlak tak, India rama hruaitu ropui tak tak Mahatma Gandhi, Sardar Vallabhbhai Patel leh a dangte lo chhuahna a nih thu a sawi bawk a. Kalkhawmte chu heng State pahthumte chanchin, hnam ziarang leh tawngte hriat belh tum turin a chah a ni.

He hun hi Pi Manisha Padhi, ADC to Governor chuan kaihruaiin program buatsaih chhan a sawifiah a. Maharashtra Governor Pu C.P. Radhakrishnan leh Gujarat Governor Pu Acharya Devvrat-te thuchah bakah heng State-te chanchin tlangpui tarlanna video thlir ho a ni a. Dr. Neeraj Thakur, Asst. Professor, College of Veterinary Science & Animal Husbandry (CVSc& AH) leh Dr. Sanjay D. Sawant, Director, RIPANS te'n Himachal Pradesh leh Maharashtra State-te chanchin tawi an sawi a. RIPANS leh Govt. Aizawl West College zirlaite'n hnam lam mawi tak tak an entir a. Hemi hnu hian Larsap hian hemi puala kalkhawmte hi Banquet Hall, Raj Bhavan-ah kawmin hun hlimawm tak an hmang ho a ni.

April ni 15, 1948 khan Himachal Pradesh hi Indian Union hnuaia Part C State ni turin a lo piang a. January ni 25, 1971 ah State puitlinga hlankai a ni. Bombay state then darh a nih avangin May ni 1, 1960 khan Maharashtra leh Gujarat state-te a piang a ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Raj Bhavan, Mizoramah Governor kaihhruaiin June, 2023 atang khan buatsaih tan a ni.