Urban Development & Poverty Alleviation (AD&PA) Department buatsaihin ni 2 chhung awh tur ‘Workshop on Rajiv Awas Yojana’ chu vawiin khan Sub-Hqrs. YMA Conference hall, Lunglei-ah neih tan a ni a, Khuallian Lunglei DC Pu Ashish Madhaorao More-in Workshop hi a hawng.

RAY Workshop hawnna inkhawm DUDO Lunglei Pu RL Zidinga kaihhruaiah Pu Ashish More chuan India ram chu ‘urbanisation’ kawngah thang nasa hle mahse mipuite nitin mamawh (basic services) chu pek sen a nih rih loh avangin khawpui tam takah mirethei an piang zel a, ‘slum area’ pawh a pung thin a ni, a ti a. Mumal zawka khawpui thanlen a pawimawh hle a, chumi atan chuan tui thianghlim pek, kawlphetha-a hniarhnang, hriselna leh faina ngaih pawimawh te a tul hle a ni, a ti. Sorkarin In nei lote tan In a sak sak chu luah lovin tam tak a awm laiin phai khawpui zawkah chenna tur indaihlohna a nasa em em thung a; mahni ram/ state mipui khawsak mila retheina umbo tura ruahman siam thiam a tul hle tih sawiin RAY Workshop-a tel zawng zawngte chu mipui mamawh tak tak pek dan tur kawngah ngaihtuahna seng turin a chah a ni.

UD&PA Jt. Director Pu HVL Zarzoenga pawhin thu sawiin UD&PA Department-in Ministry of Urban developent leh Ministry of Housing & Urban Poverty te nena khawpuia retheihna umbo nana an hmalakna kalpui mek te a sawifiah a. Retheihna umbo piah lamah khawpui nuam ‘Smart City’ siam thei tura hmalak tum a ni, a ti bawk. RAY chuan a tum ber chu khawpuia ‘slum’ piang tur awm lo tura hmalak, ‘slum’ awmsa tihbo leh ‘slum area’-a chengte chawikan a ni, a ti.

Rajiv Awas Yojana (RAY) hi June 2011 khan rampumah hman tan a ni a, Phase 2-ah then niin a tum ber chu ‘Slum Free India’ siam a ni. Mizoram-ah chuan District Capital tinah preliminary survey chu Local Council/Village Council te nen neih zawh tawh a ni a; Lunglei leh Aizawl-ah chuan ‘householder survey’ (chhungkaw awm zat chhiar) pawh neih zawh tawh a ni. RAY Pilot Project hi Zuangtui, Aizawl-ah neih a ni a, tunah hian Pilot Project hna hi tan ni tawhin mirethei mahni inhmun neia In sa thei lo ten a thlawnin In an sa mek a ni. RAY chuan in leh lo tha, inkalpawhna leh mipuite nitin mamawh phuhruk sakin India ram hi slum atangin tih zalen a tum a ni.

Vawiin RAY Workshop-ah hian Pu Eddie Zonunkima, Social Development Specialist; Pu Lalfakzuala, Management Information System Specialist leh Pi Vanlalzawnpuii, Training Co-ordinator ten RAY chungchang zirtirna leh hrilhfiahna hun an hmang a ni.