Nimin ni 21 2010 tlai lam khan Director General Military Intelligence Lt.Gen.Loomba leh Prof.Ashok Dutta, Founder Director, IIM Shillong (tuna Dean Professor, Rajiv Gandhi Indian Institute of Management, Shillong)-te chuan Chief Minister Pu Lal Thanhawla a chenna inah kawmna an nei. Inkawmnaah hian Prof. Ashok Dutta chuan IIM Shillong hnuaiah hian Centre for Development of North-East Region an neih thu leh IIM Shillong chuan Mizoramah Campus an neih theih tur thu a hrilh a. Chief Minister chuan lawmawm a tih thu leh chak taka lo bawhzui a tiam a, Chief Minister chuan Civil Service Officer-te chu training tha zawk an mamawh thu te bakah entrepreneurs-te pawh management lamah zirtirna pek an tum thu a lo hrilh bawk. IIM Shillong chuan tanna atana Class Room pahnih leh staff quarter-te chu an mamawh hmasak tur thu a hrilh. Lt.Gen.Loomba pawhin IIM Campus siam anih chuan auditorium chu army lamin an rawn tum theih tur thu a sawi.

 

 

Bultanna atan media operators (Cable TV Operators)-te tan Management Training IIM Shillong hian buatsaih sak a inhuam thu a sawi. Chief Minister chuan sorkarin hetianga IIM meuhin Mizoram an rawn ngaihven chu lawmawm a tih thu a lo hrilh a, an thiamna (expertise) chu tangkai taka hman anih tur thu a sawi. IIM Shillong hotute chuan health sector management leh sports management lampanga hmalak hmasak a that an rin thu Chief Minister an hrilh. Chief Minister hian dinner a lo buatsaih sak ani.