Kumin chhunga Mizoram pum huapa Sipai Lak Runpui, Army Recruitment Rally for Mizoram 2019 chu nimin khan Rajiv Gandhi Stadium, Mualpui, Salem Vengah neih tan a ni a. Kumin sipai lak runpuiah hian hnaruak hnawhkhah tur post 200 chuang a awm a. November 22 thlengin Sipai lakna hun hi neih a ni dawn a ni.

Sipai a tan tum te tan dilna hi Online hmanga thehluh niin kumah hian Aizawl Army Recruitment Rally 2019 a tel tum mi 2753 in dilna an theh lut a ni. Dilna thehlut zingah hian Mizoram Youth Commission(MYC) hnuaia uluk taka hrual, candidate 675 pawh an tel a. MYC hian kum dangah pawh Sipai a tan tum thalai tam tak, hlawhtling takin a lo chherchhuak tawh a ni. Kumin Army Recruitment Rally pual hian MYC chuan thalai 675 te chu written leh physical coaching pe in a lo khalh  fal tawh a. Sipai lak runpui neih Ni-ah pawh hian Salem Veng YMA te nen thawk dunin official te leh rally a tel te pualin chaw eitur a buatsaih bawk a ni.

Nimin khan Aizawl khaw pawn lam atanga lo tel te tlan tir an ni a. candidate 900 tlan tir niin heng zinga mi 250 te hi Medical Exam hmachhawn turin an tling a. Vawiin, a ni 2-naah hian mi 750 tlan tir an ni leh a, heng zinga mi 300 te chu Medical Exam hmachhawn turin tlingah puan an ni bawk a ni. Kumina Sipai Lak Runpui buatsaih mek hi Army Recruitment Office, Zemabawk, Aizawl District Bawrhsap Office, Sports & Youth Department, Superintendent of Police, Aizawl, 3rd Bn M.A.P., Power & Electricity Department, Medical Superintendent Ofiice, Fire & Emergency Department, Information & Public Relation, UD&PA, Sainik Welfare & Resettlement,  LEDS&E, NIC, MYC leh Local Council,  Salem Veng thawhhona a ni.