Aizawl, 2nd October, 2020 : Union Cabinet Minister of Jal Shakti, Ministry of Water Resources  Development and Drinking Water, Pu Gajendra Singh Shekhawat  ruahman angin Mizoram Rajya Sabha MP Pu.K.Vanlalvena chuan  September ni 30 leh October ni 1, 2020 khan Rajasthan-a Jodhpur khawpui leh a chhehvela ruahtui vantla an khawl dante a hmunah tlawhin a en.

Pu Vena chuan lui tui leh tuikhur awm lohna Rajasthan ram zau takah hmasang atangin eng tin nge tui in tur an lo neih dan tih hriat tumin Rajput ho ten ruahtui an lo khawl dân te leh Rajasthan sawrkarin thingtlang mite tana ruahtui khawlna an siamsak hmun hrang hrang ami te a fang kual a. 

Rajasthan ah hian a bikin Jodhpur District ah 370mm vel chauh kum khatah ruahtui a tla a. Chuti chung chuan tlang chhip sang lai ah te, tlang pangah te ruahtui an khuap a, a thlit fimna tur hmunte siamin leihnuaia a luan chhuahna turte an siam a. Inchung a ruahtui leh tuallaia ruah surte dah khawl nan dil tam tak an siam chawp bawk a. Chutiang taka ruahtui khawlkhawm an ngaih pawimawh avangin tui in tur hi tlachham lovin an awm thei a. Mizoramah ruahtui 2500mm aia tam kum tin ruah a sur laiin țhâl ah tui a harsa țhin hi ruahtui khawl khawm na kan neih țhat loh vang leh a nachang kan hriat tawk loh vang nia a hriat thu Pu Vena chuan a sawi a.

Ruahtui khawl chungchangah hian Pu Vena chuan Chief Minister  Pu Zoramthanga leh Union Minister of Jal Shakti ten an lo sawi dun tawh leh, Deputy Chief Minister Pu Tawnluia, PHE Department changtu ni bawk, hmalak mekna leh  School Education Department in Mizoram sawrkar school hrang hranga Rain Water Harvesting programme an buaipui mek te bawh zuiin Union Minister hi a hmu a. Minister hian Rajasthana an hnathawhte ensak tur leh a hmun te tlawh tura ruahmanna a lo siamsak angin Pu Vena hian Jodhpur hi tlawhin  a PS, Pu Isaac Rodingliana leh Ministry of Jal Shakti Official ten an tawiawm a ni.