No.5879/2020-2021
Aizawl, 8th October, 2020 : Nimin, October ni 7 khan Mizoram Rajya Sabha M.P Pu K.Vanlalvena chuan Union Minister of Jal Shakti Pu Gajendra Singh Shekhawat chu a office chamber ah hmuin ama ruahmanna anga Rajasathan state-ah ruahtui khawlna an kalpui dan enchianga a zinna report a pe a. Mizoram tana hma lak ve dan tur te an sawi dun nghal a ni.

Mizoram tana ruahtui khawlna chungchang hi Chief Minister Pu Zoramthanga chuan Union Minister hnenah a lo sawi tawh a. PHE Department changtu, Dy.Chief Minister Pu Tawnluia’n ruahtui khawl dan tur chi thum rawtna a lo thlen tawh bawk a. Education Minister Pu Lalchhandama Ralte pawhin sawrkar school hrang hranga ruahtui khawlna tur rawtna a lo thlen tawh bawk a ni.

Pu Vena chuan Union Minister hnenah hian Mizoram chu tlangram a nih avang leh tlang panga khua te awm a nih avangin Rajasthan a ruahtui khawlna an kalpui dan ang diak diak a tih ve a remchan loh dan hrilhin ruahtui khawl dan chi thum - tlangchhipa concrete tuizem lian siam te; khaw sir leh hmun remchang laia tui khuah siam a, solar power hmanga pump te; inchunga ruahtui khawlna tuizem siamte tihsak turin a ngen a. Pu Shekhawat chuan Mizoram leilung mila ruahtui khawlna project kalpui a nih tur thu leh chak taka hma lak a tum thu Pu Vena hi a hrilh a ni .