No.2220/2020-2020
Aizawl, the 19th June 2020 : Pu K Vanlalvena, MNF candidate chu vawiin khan Mizoram atanga Rajya Sabha MP thar atan thlan tlin a ni. Election Commission of India (ECI) remruatna angin vawiin khan Mizoram Legislative Assembly-a MLA 40 zinga MLA 39 te chuan Mizoram aiawh tur Rajya Sabha MP thlanna atan Legislative Assembly Secretariat-ah vote an thlak a ni.

Rajya Sabha MP Election ah vote thlak hmasa ber chu ZPM MLA Pu Lalduhoma niin Assembly Speaker Pu Lalrinliana Sailo chu vote thlaktu tawp ber niin bawm a khar a. Dar 12:15 velah khan MLA 39 te chuan vote an thlak kim vek hman a ni.

Vote tla te hi tlai dar 5:00 PM khan ECI phalna hmuh hnuin chhiar nghal a ni a, result hi Fax-in ECI thawn niin ECI lamin dar 7:30 ah result puan phalna an pek hnuah Pu H. Lalrinawma, Mizoram Legislative Assembly-a Commissioner & Secretary leh he inthlanna atan a Returning Officer ni bawk chuan Pu K. Vanlalvena chu Rajya Sabha MP atan thlan tlin anih thu a puang a. Pu K. Vanlalvena chu thlan tlin a nih nemnghehna Election Certificate a hlan nghal a ni. In thlan buaipui hna leh result puan na hi Assistant Returning Officer Assembly a Additional Secretary ni bawk Pu Lalhmahruaia Zote in a tawiawm a ni, he inthlanna atan hian ECI chuan Joint Chief Electoral Officer Pu David L Pachuau chu Observer atan a ruat a ni.

Pu K. Vanlalvena hi December ni 14, 1970 khan East Lungdar, Serchhip District-ah a piang a, a pa chu Pu K. Lalzika niin a nu chu Pi Sangvungi a ni. Mizo National Front, National Core Committee-ah Member ni lai mek a ni a. Thiamna lamah chuan B. Sc. niin Pachhunga University College chhuak a ni a. College zirlai a nih atanga ram leh hnam tana mi inpe leh he lama ngaihtuahna seng thin niin hun rei tak chhung Mizo Zirlai Pawl hruaitu lo ni tawhin Vice President post term 3 lai a chelh tawh a, President ah pawh kum 1995 khan thlan a ni. Tunah hian Bawngkawn Vengah a nupui Pi H. Lalhuapzauvi leh an fate pathum te nen an khawsa mek a ni.

Mizoram Rajya Sabha Seat khat hnawhkhahna tura inthlannaah hian candidate pathum -MNF candidate Pu K. Vanlalvena, ZPM candidate Pu B. Lalchhanzova leh INC candidate Dr. Lallianchhunga ten hming a pe lut a. Pu K. Vanlalvena hian vote 27 hmu in thlan tlin a ni a. Pu B. Lalchhanzova'n vote 7 leh Dr. Lallianchhunga'n vote 5 an hmu a ni. BJP MLA Dr. B.D. Chakma chuan rokhawlna a neih avangin vote a thlak theih loh thu Assembly Speaker a hrilh a, he thu hi Observer in ECI lam a hriattir bawk a ni.

Vawiin khan Mizoram rualin state dang 9 MLA ten Rajya Sabha MP thar tur 19 an thlang a. June ni 12 khan ECI chuan Karnataka a seat 4 leh Arunachal Pradesh a seat 1 tana hming pe lut dang an awm loh avangin chhutu awm lova tlinga an lo puang tawh a ni.

Ram Danpuiin Rajya Sabha (Council of States) a seat hnawhkhah thei tam ber chu 250 ah a tuk a, mahse hun rei tak atangin MP 245 chauh an awm thin a, heng zinga 233 chu state zawng zawng, Delhi leh Puduchhery atangin thlan a ni a, a bak 12 chu President in mi bik, ram tana kawng hrang hranga mi thawhhlawk atang tein a ruat thin a ni. Union Territory, Legislative Assembly nei lo Andaman and Nicobar Islands, Chandigarh, Dadra and Nagar Haveli and Daman and Diu, Ladakh leh Lakshadweep te chuan Rajya Sabha MP an nei lo.

Rajya Sabha hi engtik lai mahin a hun a tawp ve ngai lova mahse Rajya Sabha MP te hian kum 6 term an nei thin a. Hmun thuma thena, hmun khat MP awm zat chu kum hnih danah an term a tawp thin a ni. Lok Sabha angin Speaker a awm lova, Vice President chu Rajya Sabha. ex-Officio Chairman a ni. Deputy Chairman erawh MP te hian an mahni zing atangin an thlang thin a ni.

Rajya Sabha leh Lok Sabha te hi hrang hlak niin Session pawh a hran ve ve in an nei zel a, mahse a tul chuan an vaiin a hu hovin Joint Session an nei thei a. Hetiang Joint Session hi tun thlengin vawi 3 chauh a la awm a. Dan siam chungchangah Lok Sabha leh Rajya Sabha ngaihdan a in an loh avangin kum 1961, 1978 leh 2002 te khan Joint Session hi a lo awm tawh a ni.