Pu Ronald Sapa Tlau, INC candidate chu vawiin khan Mizoram atanga Rajya Sabha MP thar atan thlan tlin a ni. Election Commission of India (ECI) remruatna angin vawiin khan Mizoram Legislative Assembly-a MLA 40 te chuan Mizoram aiawh tur Rajya Sabha MP thlanna atan Legislative Assembly Secretariat-ah vote an thlak a ni.

Vote tla te hi vawiin tlai 5:00 PM khan chhiar nghal a ni a, result hi fax-in ECI thawn nghal niin tlai dar 6:00 PM khan Pu Ngurthanzuala Mizoram Legislative Assembly, Secretary leh he inthlanna atan Returning Officer ni bawk chuan Pu Ronald Sapa Tlau chu Rajya Sabha MP atan thlan tlin anih thu a puang a. Pu Ronald Sapa Tlau chu thlan tlin a nih nemnghehna Election Certificate a hlan nghal a ni. In thlan buaipui hna leh result puan na hi Assistant Returning Officer Assembly a Additional Secretary ni bawk Pu S.R. Zokhuma’n a tawiawm a ni.

Thlan tlin anih hnu hian Pu Ronald Sapa Tlau chuan he dinhmun sang tak chelh tura thlan tlin anih chu Pathian leh Party hnenah lawmthu sawiin Party MP nilovin Mizoram tana MP anih tum thu a sawi.

Pu Ronald Sapa Tlau hi February 2, 1954 khan Hualtu, Serchhip District-ah a piang a, a pa chu Pu Chhuanvawra Tlau (L) a ni a. Mizoram Pradesh Congress Committee-ah hian Chairman, Communication Cell leh General Secretary nihna chelh mek a nih bakah Zoram Electronics Development Corporation (ZENICS) ah Chairman hna a chelh mek bawk a ni. Thiamna lamah chuan MA (Mass Communication) Howard University USA niin tunah hian Zonuam ah a nupui Pi Ramthanpari leh an fapa pahnih te nen an khawsa mek a ni.

Mizoram Rajya Sabha Seat khat hnawhkhahna tura inthlannaah hian candidate pahnih INC candidate Pu Ronald Sapa Tlau leh MNF candidate Pu L.Ramkinlova ten hming a pe lut a, Pu Ronald Sapa Tlau hian vote 34 hmu in thlan tlin a ni a. Pu R. Ramkinlova’n vote 6 a hmu a ni.

He in thlanna hi Chief Electoral Officer Pu Ashwani Kumar leh Assistant Chief Electoral Officer Pu Dolianbuaia ten an tawiawm a ni.

Attachment

  • Loading attachment...