Chief Minister chuan ram kan humhalhna kawngah a ram neitu nihna ah kan chian hmasak angai a ni a ti. He thu hi vawiina Thenzawl Farm Venga Vantawng Group YMA Conference vawi 19-na a hmanpuina a asawi a ni.

Chief Minister chuan Zofate hian Mizoram bak hi ram dang kan nei lova, chuvangin a leilung humhalh hi kan mawh vek a ni, a ti a. Kan humhalh dawn chuan a neitu nihnaah kan chian hmasak a, kan thinlungah leh kan thil tihahte kan lantir a tul a ni a ti.Pathianin a thil siam zawng zawngte chungah chanchintha hril tura tih kan ni a, a tichereu zawnga chet hi Pathian huatthu siamna a ni a ti.

Conference a thalai kal khawmte chu ram neitu chan changa taimakna leh rinawmna nen, Pathian tih chunga ke pen turin a fuih a. Ei leh bara kan intodelh lohna ah, a mawh kan phur vek a ni tih hre tura chah in, Chief Minister chuan taima taka hnathawh a tulzia hre thar turin thalaite chu a chah nawn a ni. Hemi kawngah hian hriselna tha kan mamawh a ni tiin, chumi nei tur chuan chhunglam leh pawnlamah kan faia, ei leh in ah insuma, kan nun kan uluk angai a ni a ti a. Chief Minister chuan sorkarin thalaite tan khawvel thar a siam mek a ni tiin, sports lamah te, kan state pawnlama hna thawk thei tura thiamna ziktluak chherchhuah theihna tur, zirna In sang zawkte din chhoh mek anih thute a sawi a. Thalaite tan sorkarin hna a pe vek seng dawn lova; Mizoramah kan len vek dawn bawk loh avangin tun atang hian chutianga inbuatsaih chu a tul a ni a ti. Kan khawtlang nun chhe lai siam tha tu tur ni tura inbuatsaih turin a chah bawk a ni. Chief Minister chuan kan ram hi neitu rilru pu, mi taima leh rinawm te tan siam kan duh a ni tiin, mi hnawksakte tan siam kan tum lo a ni a ti.

Vantawng Group YMA ah hian Branch 13 awmin, Buangpui, Neihloh, Kanghmun leh Zote South Branch te tih loh ah, a bak zawng chu Thenzawl khaw chhung YMA Branch vek an ni a, member 4000 chuang an awm a ni.

YMA conference a hmanpui hma hian Chief Minister hian RGGLV hnuaia hmalak, Gas Agency, M/S Grace Indane Gramin Vitrak chu Thenzawl khua leh a chhehvel khua te tangkaipui tur ahawng hmasa a. RGGLV hnuaiah hian Mizoram thingtlang khua 13 ah gas agency dah tura ruahman a ni a. Tuna a hawn tak hi a 3-na a ni Sangau leh Thingfal dawhah. Chief Minister chuan gas tam leh tlemah sorkarin pakhatmah mawh a phur lo a ni a ti.