2431/2026-2027 

Dated Aizawl, the 30th September, 2026: Vawiin khan Land Revenue & Settlement Department bultumin Ramhlun Sport Complex Rehabilitation Centre, H/S Plan huam chhunga chengte hnena Land Pass (Digitised Records of Rights) semna hun Ramhlun Sport Complex-ah buatsaih a ni a. He hunah hian Pu B. Lalchhanzova, Hon’ble Minister, Land Revenue & Settlement Department chu khuallian a ni a, Bialtu MLA, Education Minister Dr. Vanlalthlana'n a tawiawm a ni.

Minister Pu B. Lalchhanzova chuan land pass semna programme hi mipuite tan awlsam zawkna tur leh office pan buai ngai lova anmahni kawtkaia land pass te hlanna tura ruahman a nih thu a sawi a. Rehabilitation Centre hi kum 2013-a Ramhlun Sport Complex leh Ramhlun Vengthar leimin avanga chhiatna tuarte chhawmdawlna turin, sawrkarin Pu Lalthansanga ram bigha 32.04 a leisak thu a sawi a. Master Plan siam niin chhiatna tuartute chu Category hrang hranga thenin, in hmun pek an ni tawh a; amaherawhchu hun rei tak chhung pass pek theih an nih loh thu leh, Local Council ten hmun thenkhat mimal hnena an lo khul tir nual avangin buaina hrang hrang a awm thu a sawi a. Heng buainate sutkian a nih theih nan hian December ni 8-19, 2025 chhungin GNSS Receiver hmangin survey tih that leh vek a nih thu a sawi bawk.

Re-survey-ah hian plot 146 hmuh chhuah a ni a, leimin tuar avanga ram pek 101 leh thlanmual ram sahthlak leh ram siamremleh 26, a vaiin ram 127 te chu vawiin hian Land Pass pek an ni ta tih a sawi.

Heng bakah hian LC, NGO leh Kohhranin mi an lei sak 15 te chu Land Lease-a siam zui tur a ni a, Dispute 4 awmte pawh chinfel mek a ni tih a sawi. Land Pass hi tunhma aia him zawk, changkang zawk leh bo thei lo a ni tih sawiin, LRS Department chuan mipuite banphaka awm turin theihtawp an chhuah zel tur thu a sawi bawk.

Bialtu MLA Dr. Vanlalthlana pawhin thu sawiin, ram buai chinfel hna, hun rei tak awh thin chu LR&S Minister leh Department thawktute hmalaknain tunah chuan rang taka chin fel zung zung tawh niin, thingtlang lama awm, Aizawl khawpui pan harsatte tan pawh awlsam zawkna turin chak taka hma lak a nih avangin lawmthu a sawi bawk.

Vawiin hun hmannaah hian Pu R. Lalthazuala, Director, LR&S, Pu V. Lalrindika, Asst. Director of Survey (G) te bakah bialtu AMC Corporator Pu Vanlalfaka leh Local Council hruaitu ten thu an sawi bawk a, Pi Lalhlimpuii Ralte, Jt. Director, LR&S-in lawmthu sawiin hun a khar a ni.