Environment, Forests & Climate Change Department bultumin Forest Research Centre for Bamboo and Rattan (FRCBR) Farmer’s Hall, Bethlehem Vengthlang ah ramngaw humhalh dan tha ber ber leh kalphung tha in zirtirna ‘Training of Frontline Staff and Village Forest Development Committee on Promotion of Best Practices in Forestry’ tih chu vawiin khan neih tan a ni a. Ni hnih awh tur training hi Dr. K. Kire, Additional PCCF in a hawng a ni.

He zirhona hi Green India Mission sawrkarin a kalpui mek huangchhung - ramngaw humhalh lama thawktute intuaihriamna hun atan a duan a ni a. Ramngaw humhalh leh a kaihhnawih kawnga kalphung tha ber berte tihhmasawn leh chak zawk a hmalakna in zirtir a tum ber a ni. Rain Forest Research Institute, Jorhat atanga mithiamte lokal te leh Department lam a mithiam thenkhat ten thupui hrang hrang hmangin zirtirna an pe a. Thing kui tiah dan tha te, a chi, a tang, a bul leh a zung hmanga thing chin pun dan te, organic leitha siam dan te. Mau chin pun dan te leh thingrai(agar wood) chin pun dan te zirho a ni a. He zirhona hun a tel te hi an thawhna leh an awmna khua theuh a mipui leh a mamawh tute tan zirtirna pe chhawng thei tur a beisei an ni.

He zirhona hi Forest Division hrang hrang hnuaia hmatawngtute leh Forest Development Agency hnuai a Village Forest Development Committee member-te puala buatsaih niin naktuk thleng a awh dawn a. He hunah hian mi 60 vel an tel thei a ni.

Hetiang zirhona tho hi ni 18 leh ni 19 February khan, Environment, Forests & Climate Change Department-a Forest Division leh Autonomous District Council tin huapzo, hotu lian lam tan hlawhtling taka buatsaih a lo ni tawh a ni. Hetiang zirhona hi hun lokal zel turah pawh a tul ang zel a buatsaih fo tum a ni.