No.859/2021-2022

Dated Champhai, the 8th June, 2021: Covid-19 hrileng laka him theihna tur kawnga pawimawh tak ramri kaltlanga hri inkaidarh ven dan tur chungchang ngaihtuahin vawiin khan Champhai District Bawrhsap Pi Maria C.T Zuali hovin DC Conference Hall-ah SP Pu Lalrinpuia Varte, Official-te, YMA leh ramri dep VLTF hruaitute an thukhawm.

District Bawrhsap Pi Maria C.T Zuali chuan Covid-19 hrileng laka himna tura State sawkar atanga ramri venghim tura lehkha hmuh bawhzuina kalzelah meeting koh a nih thu sawiin, Myanmar nena ramri thui tak intawm Champhai District-ah ramri ven uluk zual angaih thu a sawi a. Hripui leng vangin ramri kaltlanga inkalpawhna Free Movement Regime tihtawp lailawk a nih thu leh, kum hmasa lamah theihtawp chhuaha tanhona zara hlawhtling taka ramri venhim a lo nih tawh thin dante sawilangin, khawtlang hruaitute leh mipuite chu Covid-19 hrileng beihlet kawngah theihtawp chhuaha tanhopuiah a sawm a ni.

Meeting-ah hian ral thuhmun Covid-19 do kawngah theihtawp chhuahtlan angaih thu tarlan a ni a. Ramri kaltlanga hri kaidarh thei veng turin ngawrh lehzuala ramri venghim tura hmalak tha tih niin, a theih chen chenah Indo-Myanmar ramri dep khuaahte Covid-19 duty post siama ngawrh taka duty leh nise tih niin, Duty post turte thlan a ni a. Police ten tul leh mamawh dan ang zelin duty post-te tlawhkualin vil thin se tih a ni a, VLTF kaltlanga ramri veng tura inpete chu YMA hruaitute leh VC ruahmannain mumal taka ziahfel hnuah BDO hnenah Volunteer list thehluh nise tih a ni a. Thuthmun VLTF leh YMA Branch ten mahni ram chhunga rammut hna thawk se, an theih chin bak chu tul ang zelin Sub-Hqrs. YMA kuta thlena a tul anga bawhzui nise tih a ni bawk.

Ramri ven leh senso tul angte pawh sawiho niin, Duty post thar siam kawnga mamawh angte chhutfela District Disaster Management Authority hnena thehlut nise tih a ni a. Heng bakah hian Hnahlan tlangdung leh Tuipuiral ramri dep khuaahte ramri kaltlang hri inkaidarh tur ven chhunzawm zel a nih thu tarlan a ni bawk.

He hunah hian YMA hruaitute leh khawpui hnaivai Tiau kai khua VLTF te hnen atangin ramri ven dan tura tulte ngaihthlak a ni bawk.

Vawiin chawhnu khan Champhai khawpui chhunga Community Covid Care Centre (4C) dinna tur Kohhran hmun hma neih hrang hrangte SDO Sadar Pu Lalnunfela Chawngthu, CMO Dr. R. Lianmawia leh Official dang ten an enfiah a, he hunah hian PCI Kahrawt, Vengthlang, Vengthlang North, Venglai, Kanan leh Bethel Kohhran Hall-te a hmunah kalin kohhran hruaitute nen an enfiah a ni.