No.2802/2021-2022

Aizawl, 30th October, 2021 : Mizoram Police, Aizawl DEF buatsaihin tukin zing khan Rashtriya Ekta Diwas (National Unity Day) pualin Unity Run neih a ni a. He hunah hian Pu SBK Singh, IPS, DGP hovin  IGP Hqrs Pu Johna Neihlaia, IPS, leh DIG te, AIGP te, SsP, Commandants, Police Officers rank hrang hrang  te nen an vaiin mi 150 vel an tel a ni.

Unity Run hi hmun hnih atanga tlan țanin pawl khat chu Sikulpuikawn atangin Pu SBK Singh, IPS, DGP in a vailiam a, pawl khat dang chu Aizawl Police Station kawt atangin Pu Zosangliana, AIGP (Hqrs) in a vailiam thung a. Pawl hnih te hi Aizawl SP Office kawtah intawk khawmin hetah hian Aizawl S.P Pu C.Lalruaia kaihhruaiin Rashtriya Ekta Diwas puala hun hman a ni.

Thu sawiin Pu SBK Singh, DGP Mizoram chuan "Ram tana kan rawngbawlna kawngah leh nitina kan hnathawhnaah te inpumkhatna nei tur chuan mahni inpekna atangin kan tan tur a ni," a ti a. Police te chu mahni taksa leh hriselna vawng uluk turin a chah a. Hriselna hlutzia hria a, nitin darkar khat tal taksa hriselna atana insawizawi țhin turin Unity Runa telte chu a chah bawk a ni.

Aizawl SP, Pu C. Lalruaia pawhin Unity Run buatsaih a nih chhan tarlangin heta tel zawng zawngte lawmna thu a sawi a. Rashtriya Ekta Diwas, National Unity Day (Inpumkhatna Ni) hi kum tin October Ni 31 ah hman thin a ni a. Kumin October 31  hi Pathian Ni a nih avangin Mizoram Police te chuan Unity Run hi vawiin October 30 hian buatsaihin hun an hmang a ni.

Attachment

  • Loading attachment...