Rashtriya Ekta Diwas (National Unity Day) pualin vawiin chawhnu khan AR Ground, Lammualah hun hman a ni a, Mizoram Governor Lt. Gen. (Retd) Nirbhay Sharma PVSM, USM, AVSM, VSM kaihhruaiin Aizawl khawpuia Mizoram sawrkar hnathawkte chuan inunauna vawng nung zel tura thutiamna hun an nei a ni. 

He ni puala hun hmanah hian Mizoram Governor chuan Rashtriya Ekta Diwas (National Unity Day) hi kum 2014 atang khan kumtinin Sardar Vallabhai Patel pian champhaphak (October Ni 31) pualin India ram pumah hman thin a ni, a ti a. Sardar Vallabhai Patel chu India ram in zalenna a neih tirh atanga Union Home Minister leh Deputy Prime Minister hmasaber a nih bakah, India zalenna atana sulsutu leh India ram lalram hrang hrang hnuaia awm inpumkhat tirtu mi pawimawh tak a ni, a ti. Hei vang hian kumtinin a piancham hi National Unity Day ah hman thin a ni, a ti a. Mizoramah pawh kum 2014 atang khan kumtinin National Unity Day-ah hian sawrkar office leh zirna inah te thutiam chham rualin hun hman thin a ni, a ti. 

Governor chuan Mizoramah hnam hrang hrang leh ngaihdan inang lo tak tak te cheng ho mah ila, kan ram tana inunauna kan vawn nun zel a pawimawh a ti a. Khawtlanga upa zawkte, politician-te tiamin chi leh chi inthliar zawnga engmah tilo turin a ngen a ni. Thangthar lo la awm zel turte tan Mizoram impumkhat, hrisel leh changkang hnutchhiah i tum theuh ang u, a ti bawk. 

He ni puala hun hmanah hian Mizoram Police, 1^st Bn MAP, CRPF, BSF leh Assam Rifles ten march past an entir a. Assam Rifles te’n beating retreat-in he hun hi an khar a ni. Tukin dar 6:30 khan Sikulpuikawn atanga AR Ground, Lammual thleng ‘Run for Unity’ buatsaih chu Governor Nirbhay Sharma chuan vailiam in,  a tel ve nghal a ni.