No.1804/2021-2022
Lunglei 12th August 2021: Pi Carolin L.B Khiangte DCSO Lunglei chuan Ration Card aṭanga Delete te tan Special Allotment chungchang ah ahnuaia Public Notice hi a ti chhuak.
Aadhaar link theih loh avanga Ration Card Management System (RCMS) software atanga loh theih lohva paih (delete) ngai an lo awm tak hnuah thlatin buhfai sem tur allotment-ah an tel ve thei ta lova, buhfai an lak zui ve theih tak loh avanga mipui harsatna phuhru turin FCS&CA Department chuan August 2021 atan Special Allotment siamin heng Ration Card atanga delete ten buhfai an lak ve theih dan kawng siam a ni. Lunglei District-ah pawh mi 3403 Ration Card atanga paih, AAY (Card eng) mi 344, PHH (Card pawl) mi 2669 leh Non-NFSA (Card var) mi 390 te hnenah buhfai special allotment hi pek a ni dawn a. He Special Allotment-a tel te chuan mahni veng retailer theuhah a lak theih ang. Buhfai la thei tur list pawh Retailer tinah en theih tura pek chhuah a ni a. Heng aadhaar link loh vanga delete te hi online-a buhfai lak ve theih a nih loh avangin offline (ePOS machine kaltlang lova) lak tur a ni ang.
Special Allotment hi thla tin a awm theih dawn leh dawn loh sawi lawk theih a ni lova. Thla tin Ration la thei tur (normal allotment) zinga tel theuh thei turin Aadhaar la nei lo zawng zawng ten nei tura hma la theuh tur leh Aadhaar leh Ration Card la link lo zawng zawng ten a tul anga DC Office-a Aadhaar update emaw DCSO Office-a Aadhaar theh lut a, hma la theuh turin kan inngen nawn leh a ni.
