Nimin khan Agriculture Minister Pu R.Lalzirliana hovin Ratu khuah lo zawh runpui neih a ni a. Parliamentary Secretary Lt. Col. Z.S. Zuala, Govt. Deputy Chief Whip leh bialtu MLA ni bawk Pu RL Pianmawia leh Women Commission Chairperson Pi Lalawmpuii Chawngthu, MLA te’n he hun hi an hmanpui a ni.

Lo zawh runpui puala programme tawite buatsaihah thusawiin Pu R.Lalzirliana chuan khawvel changkang zelah Mizote khawsak phung pawh inthlak danglam zel mah se kan pipute hun atanga kan eizawnna pui ber lo neih chu tun thlengin a la pawimawh reng a. Mahni intodelh chu ropuina a ni tih leh kuthnathawh ngaihsanna nachang hria, mi taima heti zatin an thawh rah malsawmna an seng thei chu a lawmpui takzet thu a sawi a. An hlimna ni hmanpui tura an sawm chu lawmthu hrilhin hlim leh lawm taka hun hmang turin duhsakna a hlan a ni. Minister chuan tunlaia saza thi a awm fo thin chu a chhan chhui chian mek a nih thu leh natna hrik virus chi khat vang nia mithiamte’n an hriatthu he hunah hian a sawi a. Hei hi mihring tan pawha hlauhawm thei nia a lan avangin saza thi an hmu a nih chuan khawih lo tur leh Environment & Forests thawktute hnena report thuai turin mipuite a chah a ni.

Parliamentary Secretary Lt.Col.Z.S.Zuala pawhin Ratu khaw mipuite thawhrah buh hmun tha tak an hmu thei leh lo zawh ni hmanpui tura an sawm chu lawmthu a sawi a. An thawhrah thlirin Ratu khaw mipuite taimakzia a lang chiang hle, a ti.

Pu R.L.Pianmawia chuan ei leh bara intodelh mite an ropui a, Pathian thu zawm tute an ni, a ti a. Mizoram hmun dangte tana entawntlak tur khawpin mahni intodelh kawngah tan la lehzual turin a sawm a. Pi Lalawmpuii Chawngtu pawhin kuthnathawktute fuihin Agriculture mithiamte nena thawh hona tha neih chhunzawm zel a, an zirthiamna chhawr tangkai thiam turin a fuih a ni.

Ratu khawchhung atanga kilometre 8 dawna hla, Buallawn zau-ah lo zawh runpui hi hman a ni a. He hmunah hian chhungkaw 115 vel zetin lo an nei a. Buh thar rang, tai, an seng a ni. Minister leh a thawhpuite nen lo zawh leh buh seng hun hlimawm tak an hmang a, tlai lamah lo zawh ruai ropui tak an kil ho nghal a ni.

Lo zawh programme hi Agriculture Director (Crop Husbandary) Dr.C.Lalzarliana’n a kaihruai a. Buallawn zau hruaitu te, khawtlang hruaitu te, sawrkar department hrang hrang hotute leh khawtlang mipui engemawzatin he hun hi an hmang a ni.