3712/2024-2025

8th January, 2025 : Vawin khan Rural Development Minister Prof. Lalnilawma hovin Mizoram State Rural Livelihoods Mission (MzSRLM) hnuaia DDU-GKY chungchangah Project Implementing Agency (PIA) hrang hrangte nen Review Meeting neih ani a, he Review meeting ah hian hmalak leh zel dan tur (way forward plan) te ngaihtuah tel nghal a ni.

DDU-GKY hi Ministry of Rural Development Department hnuaia Skills Development project niin, thingtlanga cheng ṭhalai kum 18-35 inkar ten eizawnna ngelnghet an neih theihna turin themthiamna (skills) training pek an ni. Heng Skills Development atan hian training pe turin PIA te hmangin trade hrang hrangah training pek thin an ni.

RD Minister Prof. Lalnilawma chuan hetianga Review Meeting program ṭha tak buatsaih a nih chu lawmawm a tih thu a sawi a, tun dinhmunah DDU-GKY hnuaiah hlawhtlinna tam tak hmuh tawh a ni nain, a department ang leh Project Implementing Agency (PIA) lamah pawh hmasawn zel tura hmalak erawh a pawimawh thu a sawi. Tin, DDU-GKY 2.0 program thar chu tlangzarh theih ṭep a nih thu a sawi bawk.

Pi Zosangzuali Pachuau, CEO, MzSRLM chuan DDU-GKY hnuaiah nasa takin hmalak a ni a, COVID-19 in nasa takin program kal lai a nghawng chunga tun dinhmun a hlawhtlinna tam tak avangin PIA te hnenah lawmthu a sawi a. PIA te pawh DDU-GKY 2.0 prog launch a nih hunah pawh thawhhopuiah a sawm nghal a ni.

State Mission Manager, Pu Lalvensanga’n presentation pein, tun dinhmun ah DDU-GKY hnuaiah thingtlanga cheng thalai mi 2892 training pek tawh niin, mi 1788-in India ram hmun hrang hrangah leh India ram pawnah te hial pawh hna an hmu tawhin an thawk mek bawk a ni. DDUGKY hnuaia training theihte chu Airline Cabin Crew, Food & Beverage Service Assistant, Domestic Data entry Operator (DEO), Retail Sales Associates, House Keeping Trainee leh a dang te a ni.