1255/2023-2024

Aizawl, 25.06.2023: Rural Development Minister Pu Lalruatkima chuan vawiin khan Block Development Officer-te tana ni li awh Refresher Training Course, SIRD&PR, Leitan a buatsaih chu khuallian niin a hawng a. BDO te chu training hlawkthlak tak an neih a duhsak thu leh mipui rawngbawltu hna thawk an nih hre rengin an thiamna chu ram in hmasawnna rahbi a rah theihna atan hman ngei tura a beisei thu a sawi.

RD Minister chuan vawiina training nei tura kalkahwmte chu sawrkar in policy a duan leh hmachhawp tam tak a siamte hlawhtlinna atana kut leh ke ber an nih avangin an mawhphurhna pawh a san thu a hrilh a. India ram chu mipui sawrkarna, inthlang (election) ram niin, sawrkar chak nei tur chuan Policy leh Sawrkar kaldan tur tul angte duangtu Legislator-te leh chung Dan leh hmachhawp duansa bawhzuitu - Executive te’n an mawhphurhna theuh chak taka an bawhzui a, an tanrual a pawimawh thu a sawi a. Pu Lalruatkima chuan sawrkar hnathawk tam tak chu rinawm tak, hnaah pawh inpe tak leh taima tak an awm mahse tam tak chu an pension hun nghak ringawt leh sum hmuh na atana hmang ringawt an awm thu sawiin, rinawm taka thawktu nih chu tum ngei turin a chah.

Minister Pu Lalruatkima chuan vawiina BDO kalkhawmte chu Conduct Rules leh sawrkar hnathawk kaihhruaina dan hrang hrangin a sawi hi zawm tlat tum tura chahin, mipui rawngbawltu - Public Servant an nihna angin mipui tan harsatna siamtu ni lova, mite tana malsawmna nih tum turin leh mipui rin ngam in ni turin a chah a. An nungchang pawh uluk a pawimawh thu a sawi. Sawrkar hanthawk chu mahni tan chauh a thawk ni lovin ram leh hnam tan a thawk an nih thu hriat reng a pawimawh thu a sawi. Minister chuan office-a anmahni dawrtute chu hawihawm tak leh biak nuam taka lo dawr tura chahin, sawrkar tana theihtawp chhuah leh rinawm taka thawk turin a chah bawk a. An hnathawhna kawngah hotute tlawn ching nilo turin leh mi tlawn ringawta hman hlel ni lo tur a hrilhin, transfer chungchangah pawh hotuten an tihna hmun apiangah lungawi taka awm chu tum tur a ni a ti a. “Mihring te hi kan damchhunga in zir tur kan nih angin, in hnathawh tur hmabakah pawh in zir peih mi ni zel turin leh thil thar hre chak mi nih tum ru” tiin Minister chuan a chah a ni.

Training hawnna inkhawm hi Dr. Khawlsiamthanga Khawlhring chuan kaihruaiin, Course Director Dr. Khuangthansanga Pakhuangte chu lawmthu sawiin hun a khar thung. Ni 4 chhung training-ah hian Resource person hrang hrang atangin PMKSY Version 2.0, Soil & Water Conservation Works, BADP, MGNREGS, SDGs, Poshan Abhyaan, Swacch Bharat Mission, SAGY/ VAGY, NRLM, GPDP, SECURE and Geo-spatial planning leh PMAY(G) chungchang an zir dawn a ni. Vawiin atangin July ni 28, 2023 thleng training hi kalpui a ni dawn a, hemi chhung hian sawrkar laipui a Ministry of Rural Development ah training hi live feed pek reng a ni dawn.