Rural Development Minister Pu R. Lalzirliana chuan vawiin khan Champhai leh Khawbung RD Block-a Mizoram State Rural Livelihood Mission (MzSRLM) kalpui tan tur hawnna leh MGNREGA Sensitisation Programme, Champhai Venglai YMA Hall-a buatsaih chu a hmanpui. He hunah hian Parliamentary Secretary Lt. Col. (Rtd.) ZS Zuala chuan a tawiawm a ni.

Minister chuan MzSRLM chu miretheite pawl (Self Help Group)-ah din a, he pawl hmanga eizawnna ngelnghet siam sak a, awmze nei taka sum leh pai hman dan inzirtir a dinchhuahna kawng kawhhmuh tumna anih thu a sawi a. Kutdawh rilru pu a hnathawklo a sum hmuh tum chu Sorkarin a ngaihtheihloh thu sawiin, thawhrimna tello in hlawhtlinna tak tak a awm theilo a ni, a ti a. He scheme Champhai Block leh Khawbung Block-a kalpuina enzui tur hian Sorkar laipui chuan a thawk tur a lak tur thu a sawi bawk.

RD Minister chuan miretheite chawikang turin nasa takin Sorkarin hma a la mek a. Chuvang chuan BPL nih chu thil zahthlak a ni tih hriaa, BPL nihna atanga zuangchhuak turin taima tak leh rinawm takin an thawh ve a tul a ni, a ti a. MGNREGA leh mipui tihhmasawnna tura hmalakna hrang hrangte hi khaikhawm a hlawk leh rah tha chhuah thei tur bera thlunzawm (convergence) hi kalpui chhoh zel a nih tur thu sawiin, hei hian sum indaihloh vanga harsatna a sutkian theih thu a sawi lang bawk.

Parliamentary Secretary Lt. Col (Rtd.) ZS Zuala chuan MGNREGA siam a nihna chhan a tobul hi kan hriat thar a pawimawh thu a sawi a. Mirethei tak tak hna thawh tur hrelo leh thawh tur neilo te puih nan inhlawhfakna tha siamsak tumna a nih thu sawiin, Village Employment Council (VEC) te pawhin chu chu hre rnegin hna kalpui kawngah pawh fimkhur se a duh thu leh dikna leh rinawmna kan nitin nunah hian vawng nung tlang zel ila a tih thu a sawi a ni.

Champhai DC Pu Vanlalngaihsaka thy sawi bawkin, Champhai District chhungah BPL baseline survey nei turin hma lak tan mek a nih thu tarlangin, survey dik tak leh rintlak tak neih a nih theih nan VC ten theihtawp chhuaha Sorkar hnathawkte pawh tawiawm turin a sawm tel a ni.

Vawiin hunah hian Pi K. Lalrinzuali, State Mission Director, SRLM chuan he hmalakna hnuaia hriattur pawimawh hrang hrang sawiin, Self Help Group hi lo din tawh thin ni mahse training mumal dawn loh vang leh chhan dang hrang hrang vangin hlawhtling an tam tawklo thu a sawi a. SRLM hnuaiah hian khawtlangin puih tlak a ngaih leh thlan atang chhungkaw tina hmeichhia/nu pakhat zel Self Help Group-ah hian an tel thei a. Felfai taka an indin hnu ah revolving fund-te tum sak niin training pek an ni anga, poisa puk a rulh leh tihpun an thiam viau hnuah bank loan hmu turin department-in a buaipui zawm zel thei dawn a ni.

Vawiin hun hi Pi CC Lalchhuangkima, Project Director, DRDA-in a kaihruai a. Champhai leh Khawbung RD Block- VC leh VEC-te kohkhawm an ni a. Chawhnu lamah MGNREGA chungchanga hriattur pawimawh inhrilhfiahna hun hman a ni a. Kumin chhunga ni 73 thawh tlin theihna turin sum hmuh belh a nih tawh thu tarlan a ni. He hunah hian SRLM-a CEO Pu John LT Sanga, Dy. CEO Pi Zosangi te an tel bawk a. Pu Vanlalroluahpuia, Chief Operating Officer hnen atangin SRLM kalphung zirho a ni bawk.

Home Minister hian vawiin chawhnu khan Rii and Hawla Inter- Village Football Tournament hawnna, Chhangphut Field-a hman chu a hmanpui a. VC 30 team chuang telna tur tournament-ah hian Pu R. Lalzirliana chuan football hi eizawnna tlak, kan Mizo thalai te ngei pawhin eizawnna ber atan an hman anih thu leh, taimakna, tumruhna leh nun uluk chunga beih chuan Mizo te hi infiamna khawvelah pawh hmun sang tak thleng thei kan nih thu a tarlang a ni.