1854/2025-2026

Saitual, the 10th October, 2025 : Vawiin khan Rural Development Minister Prof. Lalnilawma chuan MLA fund hmanga sak Keifang Leitanah Panchayat Bhawan a hawng.

He hunah hian khuallian Prof. Lalnilawma chuan thu sawiin, mipuiten an mamawhte sawrkar hnena an thlen te chu chhinchhiahin, theih ang anga hma an lak thin thu a sawi a. Keifang Leitan YMA te pawhin community hall an mamawh avangin a kawng te dapin Panchayat Hall tha tak sak a lo ni ta a ni, a ti a, a hming avangin VC ta bik a ni kher lo tih sawiin khawtlang mipui a mamawh apiang tan a nih thu a sawi bawk.

Prof. Lalnilawma chuan Panchayat Bhawan chu chhawng thuma sak tura rua hman a ni, a ti a, tun dinhmunah chhawng khata sak niin, bul an tan tawh a, tawpsan mai an tum loh thu a sawi bawk. Minister chuan sawrkarin building tam tak a sa tawh thin tih a sawi a, hmang tangkai tam tak an awm laiin hmang tangkai lo leh dah awngrawp ta mai an awm thin chu pawi a tih thu a sawi.

Minister chuan Panchayat Bhawan chu khawtlang mipuiten a tangkai thei ang bera an hman a beisei thu a sawi a, intineitu bik awm loa a mamawh apiangin an hman theih nan a duhsakna a hlan a, a enkawl leh thawm that kawngah pawh sawrkar phut kher loa mawhphurna la thin turin kalkhawmte chu a chah nghal a ni.

Keifang Leitana Panchayat Bhawan hi nuaih 100 hmanga sak a ni a, financial year 2025-2026 chhunga sak tura rua hman a ni. Tun dinhmunah chhawng khata sak a ni a, a chung lam sak belh theih tura duan a ni. He Panchayat Bhawan hi lir nghing pawh dawl zo turin ban nghet tak nena sak a ni a, tui hna tha tak a awm nghal bawk a ni.

Vawiin Panchayat Bhawan hawnna inkhawm hi Pu H. Lalbiakthanga, Village Council President, Keifang Leitan chuan a kai hruai a, Elder Lalrinthara Chhangte in hunserh hmangin, Technical Report hi Pu V. Laldinsanga, Project Director, DRDO hnen atangin ngaihthlak a ni bawk. Khuallian Prof. Lalnilawma chuan thu a sawi a, Pu Laldinthara, President, YMA, Keifang Leitan Branch-in lawmthu sawinain hun a khar a ni.

Vawiin inkhawmah hian RD Minister Prof. Lalnilawma, Saitual Bawrhsap Dr. Lalngura Tlau, Pu V. Laldinsanga, Project Director, DRDO, Pu Lalzuala Sailo, SDO, PHED, Pi F. Zodingpuii, DIPRO te, VC member te leh khawtlang hruaitute an tel a ni.