4004/2023-2024

Aizawl the 29th February, 2024 : Vawiin ni 29th February, 2024 ningani zing dar 7 khan Rural Development Minister, Prof. Lalnilawma chuan Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited te tharchhuah Mizo Hmarcha Metric Ton 10 leh Sawhthing Metric Ton 18 chu CH. Saprawnga Truck Terminal, Rangvamual, Aizawl atangin a vailiam. He programme hi Dr. KC Lalmalsawmzauva, Adviser to Chief Minister (Implementation of Handholding policy) in a telpui bawk a ni.

He programme ah hian Producer Company leh Buyer aiawh ten inremsiamna thuthlung ziahna hun leh sum inhlanna an nei bawk a. Heng thlaithar leitur hi Sus Agri Development Private Limited, Bengaluru, Karnataka lam niin Sawhthing leh Mizo Hmarcha an lei hi Gujarat-ah phurhthlak tur a ni. Heng Mizo tharchhuah thlaitharte hi India ram pawna thawnchhuah tura ruahmanna siam a ni.

RD Minister Prof. Lalnilawma chuan Flag off programme chu suangtuahna a tak rama chang ta ni maia a ngaih thu a sawi a; market zawnna kawngah inrintawnna a pawimawh hle a ni tiin, he Flag-off programme hi hma lak tanna, chona thar intanna a nih thu a sawi. Kuthnathawktute’n hlawkna tam thei ang ber an dawn theih nan a hmalak chu sawrkarin a ngaih pawimawh thu a sawi a. MzSRLM te chu sawrkar kut leh ke tichaktu an ni tiin RD Minister chuan sawrkar pawhin MzSRLM hmalakna chu theihtawp chhuahpui a tum a ni, a ti a. Thlaithar leitu Sus Agri Development Pvt. Ltd te nen hun kal zelah thawhhona tha neih zel a beisei thu pawh sawiin, he thawhhona hi kuthnathawktute leh company te tan ve ve hlawkna thlentu a nih a beisei thu a sawi bawk.

Adviser to CM, Dr. KC Lalmalsawmzauva pawhin thusawina hun hmangin, Mizoram economy hi mamawh leh tharchhuahin a kaihhruai ‘market-driven economy’ - ah chantir pawimawh a tih thu a sawi a. Sawrkar hmalakna thar “Bana kaih policy” hnuaia state thar thlai chi li - hmarcha, aieng, sawhthing leh hmunphiah te chu kuthnathawktute’n market that loh lai pawha an hloh loh nan a man tuk sa anga a lei sak zel tur thu a sawi a. Adviser to CM chuan heng thlaite hi tam tham taka tharchhuah an nih angin kuthnathawktute’n an hmasawnna kawng an zawh theih nan pawl rintlak, hun rei zawk atana lei saktu tur an awm a tul thu a sawi. Farmer Producer Company-te hmalakna chu lawmawm a tih thu sawiin sawrkar chu kuthnathawktute tan an din reng tur thu a sawi bawk.

He flag off programme hi Pi H. Lalchhandami, CEO, MzSRLM in kaihruaiin Company hmalak tawh dan report Dr. C. Lalmuanpuia, CEO, Ropuiliani Women Farmer Producer Company Limited in a pe bawk. Company aiawhin Board of Directors ten thusawina hun an nei bawk a ni. He hunah hian Self Help Group member te bakah SMMU hnuaia MzSRLM Staff te, Producer Company Staff te leh Technical Support Agency aiawhte an tel bawk a ni.

Ropuiliani Women Farmer Producer Company Limited hi Mizoram State Rural Livelihoods Mission (MzSRLM), Rural Development Department hnuaia sub-scheme pakhat Mahila Kisan Sashaktikaran Pariyojana (MKSP) Value Chain project kaltlanga din a ni a. He Company kaltlang hian MzSRLM hnuaia Self Help Group member hmeichhiate chu shareholders a ziahluh an ni a, Producer Company kaltlang hian Sawhthing, Mizo Hmarcha leh Aieng hralhna mumal zawk an neih theih nan hmalakna kalpui mek a ni. He hmalakna kaltlang hian Mizoram chhunga District 7 (Champhai, Khawzawl, Saitual, Aizawl, Serchhip, Mamit, Kolasib District) leh Block 15 (Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir RD Block) tuamchhuah vek tum a ni a. Board of Directors mi 5 leh first subscribers mi 12 an awm mek bawk. He project huamchhunga khaw 126 atangin shareholders mi 10,576 tal inziaklut tura hmalak mek a ni. Tun dinhmunah Company shareholders mi 960 chuang inziaklut tawhin khaw 56 a hmalakna kalpui mek a ni. He Company enkawl tur hian staff mi 6 an awm mek a, Technical Support Agency hi Foundation for Development of Rural Value Chains (FDRVC) te an ni.

Tun dinhmunah he Producer Company hian Khawbung RD Block leh Khawzawl RD Block hnuaia Self Help Group member hmeichhia shareholders khaw hrang hrang hnen atangin Sawhthing leh Mizo Hmarcha a leikhawm mek a. Sawhthing hi kuthnathawktute hnen atangin Rs 53-70/kg a lei niin Rs 15,46,094 man hu leikhawm a ni a. Tin, Mizo Hmarcha pawh kuthnathawktute atangin Rs 340-390/kg a lei ni bawkin a zavaiin Rs 56,37,692 man hu leikhawm a ni tawh bawk. Vawiin ni thlengin kuthnathawktu te hnen atanga Sawhthing leh Mizo Hmarcha leikhawm nan hian Rs 71,83,786 lai he Company hian a hmang ral tawh a. Hetianga kuthnathawktute’n an kawtkai ngei atanga hralhna rate tha an nei thei hi a lawmawm hle a ni. Heng thlaithar leikhawm hi Company Warehouse Zoram Mega Food Park, Khamrangah dahkhawm niin a leichhawng (Buyer) tur hi Sus Agri Development Private Limited, Bengaluru, Karnataka an ni a. An ni hian Mizo hmarcha Metric Ton 10 leh Sawhthing Metric Ton 18 an lei a. Heng products te hi Gujarat-ah phurhthlak tur niin India ram pawnah thawnchhuah tura ruahmanna siam a ni.